Foto: Akorda.kz
Prezident Qasym-Jomart Toqaev «Jasyl Astana» ekologiialyq ailyǵy aiasynda uiymdastyrylǵan qalalyq senbilikke qatysyp, elordadaǵy Jelilik saiabaqta aǵash otyrǵyzdy, dep habarlaidy "Ult aqparat" Aqordaǵa silteme jasap.
Memleket basshysy senbilik barysynda volonterlermen jáne stýdenttermen áńgimelesti.
– Qazaqstan – bizdiń ortaq úiimiz. Sondyqtan úiimizdi taza ustaýymyz kerek. Aǵash otyrǵyzyp, kóshelerdi tazalaýymyz kerek. Bul – bizdiń azamattyq boryshymyz. Bizde basqa el joq. Sondyqtan bárińdi jaýapkershiligi mol azamat bolýǵa shaqyramyn. Barshańyzǵa, ásirese, volonterlerge alǵys aitamyn, – dedi Qasym-Jomart Toqaev.
Sonymen qatar Prezidentke elordany kógaldandyrý jáne abattandyrý jospary tanystyryldy.
Astana qalasynyń ákimi Jeńis Qasymbektiń aitýynsha, biyl qala aýmaǵynda 1 millionnan astam jasyl jelek, atap aitqanda túrli aǵash kóshetteri men kópjyldyq gúlder otyrǵyzý josparlanyp otyr.
Sondai-aq Esil ózeni boiyndaǵy rekreatsiia aimaqtaryna jáne saiabaqtarǵa jóndeý jumystary júrgiziledi.
Memleket basshysy qala turǵyndarynyń demalysyna qolaily jaǵdai jasaý mańyzdy ekenin atap ótip, elordany abattandyrý isine basa nazar aýdaratynyn aitty. Senbilikke qatysqandar 2 túp qaraǵai jáne 39 túp jóke kóshetin ekti.
