Foto: Aqordanyń baspasóz qyzmeti
Qazaqstan Prezidenti men Italiia Ministrler Keńesiniń tóraǵasy Djordja Melonimen kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Italiia jerinde qurmet kórsetkeni úshin Djordja Melonige alǵys aitty.
Qasym-Jomart Toqaev Qazaqstan men Italiia arasynda tyǵyz saiasi dialog, berik ekonomikalyq yqpaldastyq, tabysty mádeni-gýmanitarlyq bailanys ornaǵanyn atap ótti.
– Biz Italiianyń Ortalyq Aziiadaǵy basty seriktesi bolǵanymyzdy maqtan tutamyz. Eki el arasyndaǵy ekonomikalyq yntymaqtastyq qarqyndy damyp keledi jáne qarym-qatynastardy odan ári arttyrýǵa mol áleýet bar, – dedi Prezident.
Memleket basshysynyń aitýynsha, Italiia – Qazaqstannyń Eýropadaǵy negizgi saýda seriktesteriniń biri jáne el ekonomikasyndaǵy eń iri investorlardyń bestigine kiredi. Elderimiz arasyndaǵy taýar ainalymy 15 milliard dollarǵa jýyqtady. Italiiadan Qazaqstanǵa tartylǵan tikelei sheteldik investitsiia 7,3 milliard dollardy qurady. Búginde bizdiń elimizde 300-den astam italiialyq kompaniia tabysty jumys istep jatyr. Olardyń arasynda ENI, SDF Group, PetroValves, Maire Tecnimont, IVECO, Tenaris jáne basqa da iri investorlar bar.
Qazaqstan Prezidenti BUU, EQYU, Eýropa Keńesi jáne EYDU aiasyndaǵy álemdik arenada ortaq maqsattarǵa qol jetkizý isindegi eki eldiń tabysty yqpaldastyǵyna arnaiy toqtaldy. Sonymen qatar Qasym-Jomart Toqaev Qazaqstannyń jahandyq qaýipsizdik, óńirlik turaqtylyq, terrorizmge qarsy kúres, klimattyń ózgerýi siiaqty máselelerge qatysty yntymaqtastyqty odan ári nyǵaitýǵa daiyn ekenin jetkizdi.
Memleket basshysy Almatyda Italiia mádenieti institýtynyń ashylýyn quptady. Onyń pikirinshe, mádeni diplomatiia, bilim berý salasyndaǵy seriktestik jáne týrizm elder arasyndaǵy bailanystardy tereńdetýde mańyzdy ról atqarady.
Djordja Meloni qazaq-italian qatynastarynyń deńgeii joǵary ekenin atap ótip, Italiianyń Qazaqstanmen aradaǵy bailanystaryn nyǵaitýǵa beiildi ekenin jetkizdi.
– Sizdiń búgingi saparyńyzdy qazaq-italian qarym-qatynasyn odan ári órkendetý úshin zor múmkindik retinde qarastyramyz,– dedi Premer-ministr.
Kezdesý barysynda saýda-ekonomikalyq, investitsiialyq, energetikalyq, kólik-logistikalyq, agrarlyq, mádeni-gýmanitarlyq, bilim berý salalaryndaǵy yntymaqtastyqty keńeitý, sondai-aq jasyl energetika jáne eki memlekettiń astanalary arasyndaǵy áýe qatynasyn damytý máselelerine erekshe nazar aýdaryldy.
Budan bólek, kezdesýde óńirlik jáne halyqaralyq kún tártibindegi máseleler talqylandy.
– Búgingi kelissózder ekijaqty qarym-qatynasymyzdyń jańa kezeńine jol ashatynyna jáne yntymaqtastyqtyń perspektivti baǵyttaryn qarastyrýǵa jaqsy múmkindik beretinine senimdimin, – dedi Prezident.
Kezdesý sońynda Qazaqstan Prezidenti Qasym-Jomart Toqaev pen Italiia Premer-ministri birlesken málimdeme qabyldady.
Sondai aq mynadai qujattarǵa qol qoiyldy:
1. Qazaqstan Respýblikasynyń Úkimeti men Italiia Respýblikasynyń Úkimeti arasyndaǵy Ekinshi dúniejúzilik soǵys kezinde qaza tapqan áskeri qyzmetshiler jerlengen oryndardyń mártebesine qatysty kelisim;
2. Qazaqstan Respýblikasynyń Ádilet ministrligi men Italiia Respýblikasynyń Ádilet ministrligi arasyndaǵy ózara túsinistik jáne yntymaqtastyq týraly memorandým;
3. Qazaqstan Respýblikasynyń Mádeniet jáne aqparat ministrligi men Italiia Respýblikasynyń Mádeniet ministrligi arasyndaǵy ózara túsinistik týraly memorandým;
4. Qazaqstan Respýblikasynyń Ǵylym jáne joǵary bilim ministrligi men Italiia Respýblikasynyń Ýniversitetter jáne zertteýler ministrligi arasyndaǵy ózara túsinistik týraly memorandým;
5. Qazaqstan Respýblikasy Prezidentiniń janyndaǵy Memlekettik basqarý akademiiasy men Italiia Respýblikasynyń Ulttyq memlekettik basqarý mektebi arasyndaǵy ózara túsinistik týraly memorandým;
6. Qazaqstannyń «Samuryq-Qazyna» qory men Italiianyń «Cassa Depositi i Prestiti» kompaniialar toby arasynda birlesken investitsiialyq qor qurý jáne óńdeý ónerkásibi, energetika, logistika salalaryna investitsiia salý týraly kelisim;
7. Qazaqstannyń «QazMunaiGaz» ulttyq kompaniiasy men Italiianyń «ENI» kompaniiasy arasyndaǵy jalpy qýaty 247 MBt bolatyn gibridti elektr stantsiiasyn (jel elektr stantsiiasy, kún elektr stantsiiasy) salý jónindegi birlesken jobany júzege asyrý týraly birlesken túpkilikti investitsiialyq sheshim.
