Foto: Akorda.kz
Prezident Ishki ister ministri Erjan Sádenovti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Qazaqstandaǵy kriminogendik jaǵdai týraly baiandaldy. Erjan Sádenovtiń aitýynsha, elimizde jasalatyn qylmystar sanynyń tómendeý dinamikasy saqtalyp otyr. Kisi óltirý 20 paiyzǵa, urlyq 28 paiyzǵa, qaraqshylyq 32 paiyzǵa azaiǵan. Tonaý, buzaqylyq, mal urlyǵy, densaýlyqqa aýyr ziian keltirý faktileri, sondai-aq basqa da qylmys túrleri tómendegen.
Qasym-Jomart Toqaevqa quqyqbuzýshylyqqa múlde tózbeýshilik qaǵidatyn qalyptastyrý, zańǵa qaishy áreketter men qylmys jasaǵany úshin jazanyń bultartpastyǵyn iske asyrý, jol qaýipsizdigin qamtamasyz etý jumystary týraly málimet berildi.
Búginde 8 million 500 myń zańǵa qaishy áreket anyqtalǵan. Bul ótken jylmen salystyrǵanda 1 millionǵa kóp. Jasalǵan quqyqbuzýshylyqtar úshin 90 milliard teńge kóleminde ákimshilik aiyppul salyndy, 71 milliard teńge óndirip alyndy.
Sonymen qatar Prezidentke ishki ister organdarynyń jumysyn jetildirý, sonyń ishinde IIO qyzmetkerlerin attestatsiiadan ótkizip, vedomstvony laiyqsyz mamandardan tazartý sharalary týraly baiandaldy.
Kezdesý sońynda Qasym-Jomart Toqaev «Zań jáne Tártip» qaǵidatyn qamtamasyz etý jóninde birqatar naqty tapsyrma berdi.
Memleket basshysy qoǵamda ádildik pen tártip ornatý úshin quqyq qorǵaý organdarynyń qyzmetkerlerine úlken jaýapkershilik júktelgenin aitty.
