Qazaqstan Prezidenti Qasym-Jomart Toqaev Irannyń jańadan sailanǵan Prezidenti Ibrahim Raisige quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaev Ibrahim Raisidi Iran Islam Respýblikasynyń Prezidenti bolyp sailanýyna bailanysty Qazaqstan halqynyń jáne jeke óziniń atynan quttyqtady.
– Sailaýdaǵy aiqyn jeńisińiz – Otanyńyzdyń damýyn baiandy, irgesin berik, mereiin ústem etýge baǵyttalǵan saiasi baǵytyńyz ben baǵdarlamalaryńyzdy qoldaýdyń, sondai-aq, irandyqtardyń bolashaqqa umtylysyn ózińizben bailanystyryp otyrǵanynyń jarqyn kórinisi. Osy tusta, Iran Islam Respýblikasy men onyń halqynyń igiligi men kemel keleshegin asyl maqsat tutqan bastamalaryńyz ben qolǵa alǵan isterińizge sáttilik serik bolýyna tilektestigimdi bildiremin, – delingen jedelhatta.
Memleket basshysy Irandy Kaspii óńirindegi tatý kórshi jáne islam álemindegi Qazaqstannyń senimdi seriktesteriniń biri retinde sanaitynyn aitty.
Sonymen qatar Prezident eki el arasyndaǵy dástúrli dostyq pen ózara qoldaý rýhynda qalyptasqan yntymaqtastyqty saqtap qana qoimai, oǵan tyń serpin, jańa mán beretinine senim bildirip, ekijaqty jáne kópjaqty formattardaǵy tyǵyz yqpaldastyqty odan ári nyǵaitý úshin Iran Prezidentimen birlese kúsh jumyldyrýǵa daiyn ekenin naqtylady.
Qasym-Jomart Toqaev Ibrahim Raisidiń jaýapty qyzmetine tolaǵai tabys, otbasyna baiandy baqyt, al dostas Iran halqyna yrys pen qut-bereke tiledi.
