Foto: Akorda.kz
Qasym-Jomart Toqaev quqyq qorǵaý organdarynyń basshylarymen keńesti, - dep habarlaidy "Ult aqparat" Aqordanyń baspasóz qyzmetine silteme jasap.
Prezident Ishki ister ministri Erjan Sádenovpen, Bas prokýror Berik Asylovpen, Joǵarǵy Sot tóraǵasy Aslambek Merǵalievpen, sondai-aq basqa da salalyq vedomstvolardyń basshylarymen kezdesip, konsýltatsiialar ótkizdi. Memleket basshysy zańnyń saqtalýyna, azamattardyń quqyqtyq sanasy men quqyqtyq mádenietiniń deńgeiin arttyrýǵa qatysty máselelerge basa mán berdi.
Qasym-Jomart Toqaevtyń pikirinshe, Zań men Tártip qaǵidaty Qazaqstan qoǵamynyń ideologiialyq jáne saiasi temirqazyǵyna ainalýǵa tiis. Qazirgi qalyptasqan jaǵdai kóshedegi mádenietsizdikten bastap tóbeles, urlyq, kisi óltirýge deiingi quqyqbuzýshylyqtyń barlyq túrine ymyrasyz qarsy turýdy talap etedi.
Prezident osyndai keleńsizdiktermen tutas qoǵam bolyp kúresý kerek dep sanaidy. Elimizde turmystyq zorlyq-zombylyq, vandalizm, dórekilik jáne buzaqylyq siiaqty Zań men Tártip buzýshylyqtyń kez kelgen túrine múlde tózbeitin ári ony qatań aiyptaityn jaǵdai qalyptastyrý qajet. Áielder men balalarǵa zorlyq-zombylyq kórsetý faktileriniń batyl túrde jolyn kesý kerek.
Qasym-Jomart Toqaev Ishki ister ministrligine elorda meiramhanalarynyń birinde bolǵan kisi ólimine qatysty rezonans týdyrǵan oqiǵany erekshe baqylaýǵa alýdy tapsyrdy.
– Zań bárine birdei. Azamattarymyz zańdylyqty nyǵaitý jolynda judyryqtai jumylsa ǵana qoǵamda ádildik ornaidy. Ádiletti Qazaqstan – Zań men Tártip ústemdik quratyn el, – dedi Prezident.
Esterińizge sala keteiik, Memleket basshysy Respýblika kúni qarsańynda ótken jiynda sóilegen sózinde Ádiletti Qazaqstandy qurý úshin quqyqtyq mádenietti damytý qajet degen bolatyn.
«Zańsyzdyq, tártipsizdik, mádenietsizdik eldi jarǵa jyǵady. Mundai jaǵymsyz úrdiske búkil qoǵam bolyp qarsy turýymyz kerek. Al tártipke baǵynǵan qoǵam órkenietti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady», – dedi Qasym-Jomart Toqaev.
Prezident kezdesýler men konsýltatsiialar barysynda qoǵamda ádildik pen tártip ornatý úshin quqyq qorǵaý organdary men sot instantsiialary qyzmetkerlerine airyqsha jaýapkershilik júkteletinin atap ótti.
