Prezident Frantsiianyń jetekshi kompaniialarynyń basshylarymen kezdesti, dep habarlaidy "Ult aqparat" Aqordaǵa silteme jasap.
Sharaǵa Total Energies, Orano, Saint Gobain, Boehringer Ingelheim France, Soufflet Group, BPI France, Vicat, Syctom, Pellenc, FICT mal sharýashylyǵy qaýymdastyǵy, Total Eren, PCM, Safran, Thales, Groupe EDF, Assystem, Alstom, Evolution International, MHB SAS, Exa International, Airbus, Rungis – Semmaris, MBDA, SOPREMA, Lýi Vikat jáne basqa da iri kompaniialardyń basshylary qatysty.
Memleket basshysy óz sózinde halyqaralyq qoǵamdastyq búginde kúrdeli geosaiasi jáne ekonomikalyq máselelermen betpe-bet kelip otyrǵanyn atap ótti. Onyń aitýynsha, jańa syn-qaterler jańa múmkindikterge jol ashady. Qiyn-qystaý kezeń – bailanys ornatyp, seriktestikti damytý úshin qolaily ýaqyt.
– Biz ortaq ekonomikalyq jáne saiasi múddelerimizdi odan ári ilgeriletý úshin Frantsiiamen jáne jalpy Eýropamen aradaǵy qarym-qatynasty jolǵa qoiǵymyz keledi, – dedi Qasym-Jomart Toqaev.
Memleket basshysy Qazaqstan erkin jáne básekege qabiletti naryqtyq ekonomikany nyǵaitýdy kózdep otyrǵanyn atap ótti. Sondai-aq monopoliiadan arylý Qazaqstandy qýatty, básekege qabiletti jáne investorlarǵa tartymdy etedi dep sanaidy. Ol biznes ahýaldy jaqsartý úshin zańnamaǵa odan ári tiisti ózgertýlerdi engizýge daiyn ekenin jetkizdi.
– Bul jumystyń alǵashqy nátijeleri makroekonomikalyq derekterden kórinip otyr. Biylǵy 10 aida JIÓ ósimi 2,5 paiyzdy qurady. Bul boljanǵan nátijeden joǵary. Qoldanystaǵy tasymal tizbeginiń úzilýine qaramastan bizdiń eksportymyz 50 paiyzǵa (63,8 mlrd dollar) jýyq ósti. 2022 jyldyń alǵashqy alty aiynda sheteldik seriktesterimiz bizdiń ekonomikamyzǵa shamamen 15 milliard dollar investitsiia quidy. Bul ótken jylmen salystyrǵanda shamamen 30 paiyzǵa kóp. Aldaǵy 7 jylda biz 150 milliard dollar tikelei shetel investitsiiasyn tartýdy josparlap otyrmyz. Qazaqstan investitsiia salý jóninen Ortalyq Aziiadaǵy eń tartymdy el bolýy úshin investitsiialyq saiasatymyzdy únemi jetildirip otyramyz, – dedi Qasym-Jomart Toqaev.
Memleket basshysy Frantsiia Qazaqstannyń negizgi ekonomikalyq áriptesteriniń biri ekenin atap ótti.
– Biylǵy toǵyz aida Qazaqstan men Frantsiia arasyndaǵy taýar ainalymy 12 paiyzǵa ósti. Búginde 170-ten astam frantsýz kompaniiasy, sonyń ishinde Total Energies, Orano, Airbus, Vicat, Air Liquide, Alstom, Saint-Gobain jáne basqalary Qazaqstanda tabysty jumys istep jatyr. Olardyń barlyǵy Qazaqstan ekonomikasyna eleýli úles qosyp keledi. Frantsiianyń Qazaqstandaǵy Saýda ókildigin qurý yntymaqtastyǵymyzdy nyǵaitýǵa óz septigin tigizer edi dep sanaimyn. Biz onyń tezirek qurylǵanyn quptaimyz. Sondai-aq frantsýz kompaniialaryn elimizdiń investitsiialyq múmkindikterin qarastyrýǵa shaqyramyn. Jiynǵa qatysýshylardyń bárine Qazaqstan qaýipsiz jáne turaqty investitsiialyq orta qalyptastyrýǵa kepildik beretinin nyq senimmen aita alamyn, – dedi Memleket basshysy.
Qasym-Jomart Toqaev kezdesýge qatysýshylarǵa investitsiialyq yntymaqtastyqtyń keleshegi mol baǵyttary týraly egjei-tegjeili aitty.
– Biz agroónerkásip keshenin damytyp jatyrmyz. Onyń óndiris kólemin 2,5 ese ulǵaitý jáne eksportymyzdyń kólemin eki ese arttyrý josparlanyp otyr. Tiisinshe, biz aýyl sharýashylyǵy ónimderin tereń óńdeýge salynatyn investitsiiany yntalandyramyz jáne Frantsiianyń azyq-túlik óndirýshilerin osyǵan bailanysty investitsiialyq múmkindikterdi qarastyrýǵa shaqyramyz. Biz osyndai jobalarǵa jan-jaqty qoldaý kórsetýge daiynbyz. Ekinshiden, bul – yntymaqtastyq ornatýǵa zor áleýeti bar ekonomikanyń naqty sektory. Biz tabiǵi resýrstar qory boiynsha álemde altynshy jáne taý-ken óndirisiniń jalpy kólemi boiynsha (munai men gazdy qospaǵanda) onynshy oryndamyz. 2040 jylǵa qarai asa mańyzdy materialdar men sirek kezdesetin metaldarǵa degen álemdik suranys tórt ese artady dep boljanyp otyr. Úkimet qajetti qoldaý kórsetýge daiyn. Biz kompaniialar ózderiniń ozyq tájiribelerin, noý-haýyn jáne jańa tehnologiialaryn ákeledi dep úmittenemiz, – dedi Prezident.
Sonymen qatar Memleket basshysy energetika, kólik jáne logistika, tsifrlandyrý salalaryndaǵy yntymaqtastyq perspektivalaryna toqtaldy.
Prezident Qazaqstan men Frantsiia arasyndaǵy ekonomikalyq seriktestik barlyq salada ártaraptanyp, keńeie beretinine senim bildirdi.
– Búgingi konstrýktivti dialog biznesti órkendetýge jáne ortaq damýǵa nietti ekenimizdi taǵy da naqtylaýǵa múmkindik beredi. Meniń ákimshiligim frantsýz kompaniialaryna óńirdegi ekonomikasy eń qarqyndy damyp kele jatqan elderdiń birinde biznes júrgizýi úshin barlyq qajetti qoldaý kórsetýge daiyn, – dedi Memleket basshysy.
Kezdesý barysynda Qazaqstan-Frantsiia iskerlik keńesiniń teń tóraǵasy Iv-Lýi Darrikarrer, Syrtqy saýda, ekonomikalyq tartymdylyq jáne sheteldegi frantsýz azamattarynyń isteri jónindegi ministr-delegat, Qazaqstan-Frantsiia Úkimetaralyq komissiiasynyń teń tóraǵasy Olive Besht, Airbus kompaniiasynyń atqarýshy vitse-prezidenti Van Versh, Thales kompaniiasynyń vitse-prezidenti Marion Parada, Vicat kompaniiasynyń prezidenti Gi Sidos, Safran kompaniiasynyń aǵa vitse-prezidenti Stefan Rollan, Saint-Gobain kompaniiasynyń aǵa vitse-prezidenti Patrik Diýpin, PCM prezidenti Mario Martinoni, Soufflet Group kompaniiasynyń bas direktory Kristof Passeland, Boehringer Ingelheim France ókili Naidjel Svift jáne Evolution International kompaniiasynyń biznesti damytý jónindegi direktory Siril Djoss sóz sóiledi.
