Prezident Qasym-Jomart Toqaev Ulttyq ekonomika ministri Áset Erǵalievti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna biylǵy I toqsandaǵy elimizdiń ekonomikalyq damýynyń aldyn ala qorytyndylary, Ekonomikalyq ósimdi qalpyna keltirýdiń keshendi josparynyń iske asyrylýy týraly esep berildi.
Prezidentke ekonomikanyń naqty sektoryndaǵy ahýal jáne jalpy ishki ónimge qatysty boljamdar jóninde baiandaldy. Áset Erǵaliev Qasym-Jomart Toqaevqa ortamerzimdi perspektivadaǵy ekonomikanyń sapaly ári ornyqty damýyn qamtamasyz etýdiń negizgi joldaryn usyndy.
Sonymen qatar ministr shaǵyn jáne orta biznesti qoldaý jónindegi Prezident tapsyrmasynyń oryndalýy týraly baiandady.
Kezdesý barysynda makroekonomikalyq turaqtylyqty jáne óńirlik damýdyń tepe-teńdigin qamtamasyz etý jónindegi sharalarǵa basa mán berildi.
Kezdesý sońynda Memleket basshysy ministrge biýdjet saiasatynyń tiimdiligin arttyrýǵa, óńirlik saiasatty jetildirýge jáne óńdeý ónerkásibin damytýǵa baǵyttalǵan birqatar naqty tapsyrma berdi.
