Foto: Akorda.kz
Memleket basshysy Energetika ministri Almasadam Sátqalievti qabyldady, - dep habarlaidy "Ult aqparat" Aqordaǵa silteme jasap.
Prezidentke energetika salasyn damytýdyń negizgi máseleleri men elimizdiń otyn-energetika kesheniniń biylǵy 10 aidaǵy kórsetkishteri, sondai-aq munai-gaz jáne energetika baǵyttaryndaǵy iri jobalardyń júzege asyrylýy jóninde málimet berildi.
Kezdesý barysynda Almasadam Sátqaliev atalǵan kezeń ishinde Qazaqstandaǵy munai óndirý kólemi 74,8 million tonnany, al munai ónimderiniń óndirisi 11,2 million tonnany quraǵanyn jetkizdi. Sonymen qatar 48,7 milliard tekshe metr gaz, 93,5 milliard kVt/caǵ elektr qýaty jáne 15,35 myń tonna ýran óndirilgen.
Qasym-Jomart Toqaevqa ulttyq elektr jelisin damytý úshin atqarylyp jatqan sharalar, biyl maýsym aiynda iske qosylǵan elektr energiiasyn naryqta satýdyń jańa mehanizmi jóninde baiandaldy.
Memleket basshysyna qysqy jylytý maýsymy qalypty ótý úshin qosymsha baqylaý ornatylǵany týraly aqparat berildi. Atap aitqanda, energetika nysandaryn qamtamasyz etý maqsatynda 5,5 million tonna kómir men 100 myń tonna mazýt qory daiyndalǵan.
Buǵan qosa Memleket basshysyna vedomstvonyń el aimaqtaryna odan ári gaz qubyryn tartý jospary tanystyryldy.
Kezdesý sońynda Prezident jylytý maýsymynyń barysyn jáne energetika infraqurylymyn jańǵyrtý jobalarynyń iske asyrylýyn airyqsha baqylaýda ustaýdy, sondai-aq ishki naryqty janar-jaǵarmaimen jáne suiytylǵan munai gazymen úzdiksiz qamtamasyz etý sharalaryn qabyldaýdy tapsyrdy.
