Qasym-Jomart Toqaevtyń tóraǵalyq etýimen bolǵan Parlament Senaty biýrosynyń otyrysynda depýtattardyń aimaqtarǵa saparynyń qorytyndysy shyǵaryldy, dep habarlaidy "Ult aqparat" joǵary palatanyń baspasóz qyzmetine silteme jasap.
Palata Tóraǵasynyń orynbasary Bektas Beknazarov senatorlardyń jumys sapary týraly sóz sóiledi. Onyń aitýynsha, parlamentshiler elimizdiń barlyq aimaqtarynda, onyń ishinde shalǵai eldi mekenderde júzdegen kezdesýler ótkizdi. Memleket basshysynyń jańa áleýmettik bastamalary - sharalardyń basty taqyryby boldy. Aimaq turǵyndary Parlament qabyldaǵan zańdar týraly jan-jaqty habardar etildi.
Kezdesýlerde kóp balaly otbasylarǵa jáne az qamtylǵan azamattarǵa járdemaqy taǵaiyndaý máselelerine basa nazar aýdaryldy. Sharaǵa qatysýshylar azamattardy turǵyn úimen qamtamasyz etý, jergilikti avtomobil joldaryn salý, aýyl muǵalimderiniń eńbekaqysyn kóterý, jańa jumys oryndaryn ashý, kommýnaldyq qyzmetter tarifterin retteý jáne kúndelikti qajetti taýarlarǵa baǵany tómendetý máselelerin kóterdi.
Senat Tóraǵasy Q. Toqaev qazirgi kezeńde barlyq memlekettik organdardyń qyzmeti «Nur Otan» partiiasynyń HVIII sezindegi Memleket basshysy alǵa qoiǵan naqty mindetterdi sheshýge arnalýy tiis ekenin atap ótti.
«Qazirgi álemdik jáne ulttyq ekonomikadaǵy jaǵdaiǵa sáikes eldiń áleýmettik damýyna qajetti sharalardy júzege asyrý - ýaqyt talabynan týyndap otyrǵan mańyzdy mindet. Onyń ishinde áleýmettik jaǵynan az qamtylǵan azamattar men kóp balaly analarǵa qamqorlyq kórsetý memlekettik organdardyń udaiy nazarynda bolýy tiis», - dedi Q.Toqaev.
Ol depýtattar men Úkimetti halyqtyń áleýmettik turmys-tirshiligin jaqsartý maqsatynda naqty jumystardy asa joǵary jaýapkershilikpen atqarýǵa shaqyrdy. Ulttyq qor men respýblikalyq biýdjetten bul jumystarǵa qomaqty qarjy bólinetini aityldy.
Senat Tóraǵasy qysqa merzimde áleýmettik baǵdarlamalardy jáne respýblikalyq biýdjetti naqtylaýdy zańnamalyq turǵyda qamtamasyz etý jónindegi aýqymdy jumystar atqarylatynyn atap ótti. Q.Toqaev halyqty áleýmettik qoldaýǵa baǵyttalǵan keshendi sharalardy kópshilikke keńinen nasihattaýdyń mańyzy airyqsha, dep sanaidy.
Biýro otyrysynda Palatanyń 14 naýryzǵa josparlanǵan kezekti otyrysynyń kún tártibi bekitildi. Keibir zańnamalyq aktilerine biznes-ortany damytý jáne saýda qyzmetin retteý, sondai-aq balanyń quqyqtaryn qorǵaý jónindegi fýnktsiialardy júzege asyratyn uiymdardyń qyzmetine bailanysty máseleler boiynsha ózgerister men tolyqtyrýlar depýtattardyń nazaryna usynylady. Senatorlar sondai-aq Qazaqstan men Ózbekstan úkimeti arasyndaǵy Energetika salasyndaǵy yntymaqtastyqtyń keibir máseleleri týraly negizdemelik kelisimdi ratifikatsiialaý týraly zań jobasyn da qaraidy.
Biýroda Májilisten túsken zań jobalary turaqty komitetterge bólinip berildi. Halyqaralyq qatynastar, qorǵanys jáne qaýipsizdik komiteti «1995 jylǵy 23 jeltoqsandaǵy Qazaqstan Respýblikasy men Resei Federatsiiasy arasyndaǵy Baiqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany ratifikatsiialaý týraly» zań jobasy boiynsha bas komitet bolyp; Qarjy jáne biýdjet komiteti «Qazaqstan Respýblikasynyń Úkimeti men Qytai Halyq Respýblikasynyń Úkimeti arasyndaǵy Qytai Halyq Respýblikasynyń jeńildikti kredit berýi týraly negizdemelik kelisimdi ratifikatsiialaý týraly» zań jobasy boiynsha bas komitet bolyp belgilendi.
