Foto: Akorda.kz
Prezident Ekibastuz qalasyndaǵy jylý elektr ortalyǵynyń jaǵdaiymen tanysqan soń jergilikti turǵyndarmen áńgimelesti. Qala turǵyndary úilerin jylýmen qamtamasyz etýdiń mán-jaiy týraly aitty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy qiyn-qystaý jaǵdaida shydamdylyq tanytqany jáne apat saldaryn joiý kezinde azamattyq belsendilik kórsetkeni úshin ekibastuzdyqtarǵa alǵys aitty.
– Ekibastuzǵa ahýaldy kórý úshin arnaiy kelip otyrmyn. Ótken qys ońai bolǵan joq. Bárin kórdim, túsinemin. Degenmen bárimiz bir ult, bir el retinde aýyzbirshilik tanytýymyz kerek. Qala turǵyndary osy qiyn jaǵdaida sabyrlyq tanytyp, shydady. Azamattyq pozitsiiasyn, kózqarasyn bildirdi. Sondyqtan barshańyzǵa rizashylyǵymdy bildiremin. Úkimetke tiisti tapsyrmalar berildi. Tiisti qarajat bólindi. Sondyqtan bári oidaǵydai bolady dep oilaimyn, – dedi Prezident.
Qasym-Jomart Toqaev byltyrǵy tótenshe jaǵdai qaitalanbaýy úshin Úkimet tarapynan barlyq qajetti sharalar qabyldanyp jatqanyn málimdedi.
Sonymen qatar turǵyndar memleket tarapynan kórsetilip jatqan qoldaý úshin alǵys aityp, qalany abattandyrý jáne áleýmettik nysandar salý máselesin kóterdi. Atap aitqanda, Ekibastuz qalalyq ardagerler keńesiniń tóraǵasy Samat Ramazanov «Shahter» saiabaǵyna kúrdeli jóndeý júrgizý qajet ekenin aitty. Al kópbalaly ana Aiana Smaǵulova qalada balalardyń bos ýaqytyn tiimdi ótkizip, olardyń jan-jaqty damýyna arnalǵan Shyǵarmashylyq úiin salyp berýdi surady.
Memleket basshysy turǵyndardyń ótinishterin nazarǵa alyp, tiisti tapsyrma beretinin jetkizdi.
– Durys aitasyz. Nazarǵa alamyz. Qysqa ýaqyt ishinde Shyǵarmashylyq saraiyn salamyz. Jalpy, bizge el kóleminde óskeleń urpaqqa qyzmet etetin nysandardy kóbirek salý kerek. Sportpen ainalysý kerek ekenin aityp júrmin ǵoi. Balalalardy sportqa baýlý kerek. Biraq ol úshin laiyqty sport alańdary, stadiondar qajet. Tipti, ondai sport nysandar elorda da jetispeidi. Sondyqtan ákimder bul máselemen mindetti túrde ainalysýy kerek, – dedi Qasym-Jomart Toqaev.
