Qazaqstan Prezidenti Qasym-Jomart Toqaev Cheh Respýblikasy Depýtattar palatasynyń tóraǵasy Radek Vondrachekpen kezdesti, dep habarlaidy Aqorda.
Memleket basshysy Qazaqstanǵa resmi saparmen kelgen Cheh Respýblikasy Depýtattar palatasynyń tóraǵasy Radek Vondarchekpen kezdesti.
Taraptar Qazaqstan men Chehiia arasyndaǵy qatynastardyń qazirgi ahýaly men perspektivalaryn, atap aitqanda, Qazaqstan – Eýropalyq odaq, Ortalyq Aziia – Eýropalyq odaq jáne Ortalyq Aziia – Vyshegrad tórttigi (Chehiia, Polsha, Vengriia jáne Slovakiia) siiaqty kópjaqty formattaǵy yqpaldastyq máselelerin talqylady.
Memleket basshysy Radek Vondarchekti Barqyt tóńkerisiniń 30 jyldyǵymen, Chehiianyń NATO-ǵa kirýiniń 20 jyldyǵymen jáne aldaǵy Respýblika kúnimen quttyqtady. Sondai-aq Prezident Qazaqstannyń Eýropalyq odaqtaǵy mańyzdy saiasi ári ekonomikalyq seriktesi sanalatyn Chehiiamen aradaǵy bailanystardy odan ári damyta beretinimizdi atap ótti.
– Sizdiń bul saparyńyz eki el parlamentteri arasyndaǵy ózara is-qimyldardy nyǵaitý turǵysynan ǵana emes, sondai-aq, ekijaqty yntymaqtastyqqa tyń serpin berý maqsatynda da óte mańyzdy, – dedi Memleket basshysy.
Óz kezeginde cheh saiasatkeri qonaqjailyq kórsetip, jyly qabyldaǵany úshin Memleket basshysyna alǵys bildirip, elimizde júzege asyrylyp jatqan reformalardy joǵary baǵalady.
– Cheh Respýblikasynyń ókili retinde eki el arasyndaǵy yntymaqtastyqtyń dostyq jáne dástúrli rýhta órbip, óte tyǵyz ári tereń qarym-qatynastyń qalyptasqanyn rastaýǵa múmkindik týǵanyna qýanyshtymyn,– dedi Radek Vondarchek.
