Qasym-Jomart Toqaev «Altyn sapa» jáne «Paryz» syilyqtarynyń iegerlerin marapattaý rásimine qatysty, dep habarlaidy "Ult aqparat" Aqordaǵa silteme jasap.
Memleket basshysy Qazaqstan Respýblikasy Prezidentiniń «Altyn sapa» jáne «Paryz» syilyqtarynyń iegerlerin saltanatty túrde marapattaý rásiminde beinebailanys rejiminde sóz sóiledi.
Qasym-Jomart Toqaev óz sózinde «Altyn sapa» baiqaýy 15 jyldan beri ótkizilip kele jatqanyn jáne búginge deiin 150-den astam kompaniia Prezident syilyǵynyń iegeri atanǵanyna nazar aýdardy.
– Biylǵy saltanatty jiyn Táýelsizdiktiń 30 jyldyq mereitoiymen tuspa-tus kelip otyr. Munyń zor simvoldyq máni bar. Egemendik kezeńinde Qazaqstanda biznestiń damýyna jan-jaqty jaǵdai jasaldy. Sonyń nátijesinde jańa zamanǵa sai kásipkerler shoǵyry qalyptasty. Olar ulttyq ekonomikanyń basty qozǵaýshy kúshine ainalýda, – dedi Memleket basshysy.
Prezident otandyq biznestiń elimizdi indýstriialandyrý úderisindegi úlesi týraly aita kele, sońǵy 10 jylda óńdeý ónerkásibiniń ekonomikadaǵy úlesi taý-ken salasynyń kórsetkishinen asyp, 13 paiyzǵa jetkenin atap ótti.
– Búkil elimiz boiynsha 1500 jańa óndiris iske qosyldy. Bul maqsatqa 9 trillion teńgeden astam investitsiia jumsaldy. 220 myńnan astam turaqty jumys orny ashyldy. Byltyr óńdeý ónerkásibiniń eksporty 3 ese ósip, 15,4 milliard dollarǵa jetti. Qazaqstanda óńdelgen ónimder búginde 131 memleketke eksporttalady, – dedi Qasym-Jomart Toqaev.
Memleket basshysy otandyq ónerkásipti, meditsina ǵylymyn tsifrlandyrý isindegi jetistikterge toqtaldy.
Prezident óz Joldaýynda 2025 jylǵa qarai óńdeý ónerkásibiniń eksportyn 1,5 esege, eńbek ónimdiligin 30 paiyzǵa arttyrý mindetin júktegenin eske saldy. Onyń pikirinshe, bul asa mańyzdy maqsat. Oǵan qol jetkizý úshin barlyq múmkindik bar jáne qajetti jaǵdailar jasalýda.
Osy rette, Qasym-Jomart Toqaev otandyq óńdeý ónerkásibiniń shikizatqa qol jetimdiligin qamtamasyz etetin «Ónerkásip saiasaty týraly» Zańdy tezirek qabyldaýdyń mańyzdy ekenin atap ótti.
Sonymen qatar Memleket basshysy otandyq biznestiń kórshi elderdiń naryǵyna shyǵýy úshin zamanaýi infraqurylymdy damytý qajettigi jóninde aitty.
– «Qorǵas» shekara mańy yntymaqtastyǵynyń halyqaralyq ortalyǵy tabysty jumys istep tur. Sonymen qatar taǵy tórt transshekaralyq hab: onyń ekeýin Reseimen shekarada, Ózbekstanmen jáne Qyrǵyzstanmen shekarada bir-birden salý josparlanýda. Bul tranzaktsiialyq shyǵyndardy azaitýǵa, kólik logistikasynyń tiimdiligin arttyrýǵa jáne nátijesinde eksportymyzdy ulǵaitýǵa múmkindik beredi, – dedi Prezident.
Memleket basshysy elimizde óndiriletin taýarlardyń básekege qabilettiligin arttyrýdyń jáne sapany baqylaýdyń zamanaýi júiesin engizýdiń mańyzdylyǵyna nazar aýdardy.
– Kásiporyndardyń biznes-protsesterine jasalatyn diagnostika osy saladaǵy jahandyq úrdisterge sai bolýǵa tiis. Bul jerde, eń aldymen, tsifrlandyrý jáne Indýstriia 4.0 elementterin paidalaný týraly sóz bolyp otyr. Osyǵan bailanysty «Altyn sapa» konkýrsynyń talaptaryn Sapany basqarýdyń eýropalyq qorynyń (EFQM) jańa modeline birtindep sáikestendirý kerek. Biz úzdik halyqaralyq úlgiler men tájiribelerge sai bolýymyz qajet, – dedi Qasym-Jomart Toqaev.
Sonymen qatar Memleket basshysy ónerkásip salasynda bilikti mamandardyń jetispeitinine erekshe nazar aýdardy. Bul – indýstriialandyrý úderisin tejeitin faktorlardyń biri.
– 2025 jylǵa qarai 500-ge jýyq indýstriialyq jobany iske qosýdy josparlap otyrmyz. Úkimet atalǵan óndiris oryndarynda jumys isteitin bilikti kadrlardy osy bastan daiyndaýy kerek. Búginde memleket jumys berýshilerge naqty qoldaý kórsetip otyr. Jumys ornynda oqytý, «Urpaqtar kelisimsharty» jáne «Alǵashqy jumys orny» siiaqty jas mamandarǵa qoldaý kórsetý sharalary iske asyrylýda. Memleket tarapynan tiisti sýbsidiialar qarastyrylǵan. Degenmen, áli de jetkiliksiz. Úkimet «Atameken» ulttyq kásipkerler palatasymen birlese otyryp, jumyspen qamtýdy jáne qyzmetkerlerdiń biliktiligin arttyrýdy yntalandyrýǵa baǵyttalǵan qosymsha sharalardy pysyqtaýy qajet, – dedi Prezident.
Qasym-Jomart Toqaev indet kezinde elimizdiń densaýlyq saqtaý júiesine zor qoldaý kórsetken otandyq kásipkerler men Qazaqstandaǵy halyqaralyq kompaniialar áleýmettik jaýapkershilik qaǵidasyn árdaiym berik ustanatynyn atap ótti.
Budan bólek biylǵy «Paryz» baiqaýyna qatysýshylardyń áleýmettik jobalarǵa jáne qaiyrymdylyq sharalarǵa 20 milliard teńgege jýyq qarjy jumsaǵany atap ótildi. Olar 7 myń jańa jumys ornyn ashqan.
– Elimizdi órkendetýge jáne halyqtyń ál-aýqatyn arttyrýǵa biznes ókilderi barynsha atsalysýda. Osy oraida men barsha kásipkerlerge shynaiy rizashylyǵymdy bildiremin. Sondai-aq osy baiqaýlarǵa qatysqan kásiporyndarǵa arnaiy alǵys aitamyn. Ásirese, eńbek ujymdaryn bólek atap ótkim keledi. Bul marapattar – kóp jylǵy qajyrly eńbektiń jemisi, – dedi Memleket basshysy.
Prezident konkýrs jeńimpazdaryn jariialap, shyn júrekten quttyqtady. Sondai-aq búgingi marapat olardyń jumystarynyń odan ári tabysty bolýyna tyń serpin beretinine senim bildirdi.
Biyl «Altyn sapa» konkýrsynyń «Úzdik indýstriialyq joba» nominatsiiasyn «YDD Corporation» jaýapkershiligi shekteýli seriktestigi (Qaraǵandy oblysy) ielendi, «Úzdik innovatsiialyq joba» nominatsiiasy boiynsha ««Agrofirma TNK» (Aqmola oblysy) jaýapkershiligi shekteýli seriktestigi úzdik atandy. «PO Global-Spetsodejda» jaýapkershiligi shekteýli seriktestigi (Aqtóbe oblysy) men «Karachaganak Petroleum Operating B.V.» jaýapkershiligi shekteýli seriktestiginiń qazaqstandyq filialy (Batys Qazaqstan oblysy) «Paryz» konkýrsynyń bas júldesin ielendi. Jeńimpazdarǵa júldelerdi Premer-Ministr Asqar Mamin tabystady.
