Memleket basshysy Qasym-Jomart Toqaev Qaraǵandyda elimizdiń indýstriialyq-innovatsiialyq damýy jóninde keńes ótkizdi, dep habarlaidy Aqorda.
Jiyndy ashqan Memleket basshysy Qazaqstanǵa jahandyq, ásirese óńirlik naryqta tabysty básekege qabiletti, qýatty ári tehnologiialyq turǵydan progressivti ónerkásip qajet ekenin atap ótti.
«Biz álemdik koniýnktýranyń nasharlaǵan jaǵdaiynda básekeniń artqanyn, saýda qaqtyǵystarynyń shieleniskenin, jalpy jahandyq qarama-qaishylyqtardy baqylap otyrmyz. Biz kórip otyrǵandai, álem bir ornynda turmaidy. Sondyqtan, biz ýaqyttan qalyp qoimaýymyz qajet», – dedi Qasym-Jomart Toqaev.
Prezident memlekettik organdar men biznes ókilderi kezdesýiniń maqsaty ekonomikadaǵy qurylymdyq ózgeristerdi tabysty iske asyrý úshin sheshýge tiisti máselelerdi talqylaý ekenin aitty.
«Indýstriialandyrý jyldary tartylǵan investitsiia kólemi 8 trillion teńge bolatyn 1 250 jańa ónerkásip oryndary paida boldy. 120 myń jańa jumys oryndary ashylǵan. Qazaqstanda buryn óndirilmegen 500-den astam jańa ónim túrlerin shyǵarý jolǵa qoiyldy» dep, Memleket basshysy atqarylǵan jumystardyń qorytyndysyn shyǵardy:
Sonymen qatar, Qasym-Jomart Toqaevtyń baǵalaýy boiynsha ekonomika qurylymynda túbegeili ózgeris baiqalmaidy. 10 jyldan astam ýaqyt boiy jalpy ishki ónimdegi óńdeý ónerkásibiniń úlesi 11 paiyzdyń ainalasynda. 2015-2018 jyldar aralyǵynda eńbek ónimdiliginiń ósimi josparlanǵan 12 paiyzdyń ornyna 4 paiyzǵa ǵana jetti.
Osyǵan bailanysty Prezident Úkimet pen ákimdikterdiń sheshýi tiis birqatar mindetterdi atap ótti.
Birinshi baǵyt – daiyn ónim eksportyn belsendi damytý. Baiandamada atap ótilgendei, sońǵy 3 jyl ishinde eksporttyń jalpy qurylymynda óńdeý sektorynyń úlesi 34 paiyzdan 8 paiyzǵa, iaǵni 2016-2018 jyldary 26 paiyzǵa deiin tómendegen. Qazaqstan óńdeý ónerkásibiniń 180-ge jýyq taýar túrlerin eksporttaidy. Bul kórsetkish Reseide – 358, Belarýste – 690, Qytaida – 1400, Ekonomikalyq yntymaqtastyq jáne damý uiymy elderi boiynsha ortasha kórsetkish – 1950.
Memleket basshysy otandyq óndirýshilerdiń syrtqy naryqqa shyǵýyna serpin beretin birqatar naqty sharalardy usyndy. Onyń aitýynsha, perspektivti eksport naryqtaryna taldaý jasaý, osy naryqtarǵa shyǵý úshin kedendik salyqtardy, tariftik jáne basqa da talaptardy zertteý, tiimdi kólik-logistikalyq sheshimderdi anyqtaý qajet.
Nazar aýdaratyn taǵy bir mańyzdy sala – sapaly marketing. Qasym-Jomart Toqaev atap ótkendei, jalpymemlekettik brend, al onyń bazasynda investitsiialyq, týristik jáne salalyq brendter qalyptastyrý jónindegi tapsyrma áli oryndalmaǵan. Prezidenttiń aitýynsha, mundai ahýal otandyq ónim úshin shatyrly brendterdi qalyptastyrýda da baiqalady.
Memleket basshysy Úkimetke brend qalyptastyrý jónindegi jumystardy aiaqtaýǵa eki ai ýaqyt berdi.
Ekinshi baǵyt – «qarapaiym zattar ekonomikasyn» damytý. «Elimizde biz maqtan tutatyn kóptegen taýar óndiristeri bar», – dep sanaidy Qasym-Jomart Toqaev.
Otandyq óndirýshilerdi qoldaýǵa bólingen maqsatty 600 milliard teńge biýrokratiialyq problemalarǵa bailanysty tiisti adresatyna jetpegen.
«Maǵan baiandalǵandai, 16 tamyzdaǵy jaǵdai boiynsha jalpy quny 62,3 milliard teńgeni quraityn 148 joba ǵana maquldanǵan», – dedi Prezident.
Qazaqstan Prezidenti memleket retteitin satyp alýlardyń jaǵdaiyn synǵa alyp, jyl saiyn munyń kólemi 10 trillion teńgeden asatynyn atap ótti. «Bul rette, Qazaqstannyń úlesi 34 paiyzdy qurap otyr. Bul durys emes. Biz onyń úlesin áldeqaida arttyra alamyz», – dedi Qasym-Jomart Toqaev.
Memleket basshysy sóilegen sózinde investitsiia salasyndaǵy ahýalǵa jan-jaqty taldaý jasady. Atap aitqanda, Qazaqstan Prezidenti erkin ekonomikalyq jáne indýstriialyq aimaqtar «investitsiia tartý oryndaryna» tolyqtai ainala almaǵanyn atap ótti.
Sonymen qatar Prezident joǵary qaita jasaý óndirisiniń, indýstriia 4.0 elementteri men innovatsiiany damytýdyń, indýstriialandyrýǵa qoldaý kórsetý quraldarynyń tiimdiligin arttyrýdyń perspektivalaryna toqtaldy.
«Jańa ekonomikany qurý bazalyq salalardy innovatsiialyq jáne ǵylymi-tehnikalyq turǵydan ilgeriletýge, sondai-aq «bolashaq ekonomikasynyń» salalaryn damytýǵa negizdelýge tiis», – dedi Memleket basshysy.
Jiyn barysynda Indýstriia jáne infraqurylymdyq damý ministri Roman Skliar, «Samuryq-Qazyna» UÁQ» AQ basqarmasynyń tóraǵasy Ahmetjan Esimov, «Evrazian Fýds» AQ basqarmasynyń tóraǵasy Oleg Vinokýrov, Qaraǵandy oblysy Kásipkerler palatasynyń óńirlik keńesi janyndaǵy jeńil ónerkásip komitetiniń tóraǵasy Andrei Shmarin, «Azala cotton» JShS bas direktory Baýyrjan Jamalov, «Zerde» JShS bas direktory Muhtar Bitemirov, «Almaty ventiliat zaýyty» JShS bas direktory Marat Baqqulov, «Qazenergokabel» AQ bas direktory Vladimir Bobrov sóz sóiledi. Basqosýǵa Premer-Ministrdiń orynbasary Jeńis Qasymbek, Saýda jáne integratsiia ministri Baqyt Sultanov ta qatysty.
Qasym-Jomart Toqaevtyń eskertpeleri men jiynǵa qatysýshylardyń usynystary indýstriialandyrýdyń úshinshi besjyldyǵynyń jobasyn jetildirý barysynda eskeriletin bolady.
