Memleket basshysy Ujymdyq qaýipsizdik shart uiymynyń sessiiasyna qatysty.
Bishkek qalasynda Ujymdyq qaýipsizdik shart uiymy (UQShU) Ujymdyq qaýipsizdik keńesiniń sessiiasy ótti, dep habarlaidy "Ult aqparat" Aqordaǵa silteme jasap.
Qazaqstan Prezidenti Qasym-Jomart Toqaev, Belarýs Prezidenti Aleksandr Lýkashenko, Qyrǵyzstan Prezidenti Sooronbai Jeenbekov, Resei Prezidenti Vladimir Pýtin, Tájikstan Prezidenti Emomali Rahmon, Armeniianyń Premer-Ministri Nikol Pashinian, sondai-aq UQShU Bas hatshysynyń mindetin atqarýshy Valerii Semerikov shaǵyn quramda kezdesý ótkizdi. Sodan keiin delegatsiia músheleriniń qatysýymen kelissózder jalǵasty.
Memleketter basshylary halyqaralyq jáne óńirlik qaýipsizdikti qamtamasyz etý jóninde pikir almasty. UQShU-nyń 2019 jylǵy basym baǵyttarynyń iske asyrylýyn qorytyndylap, aldaǵy josparyn anyqtady.
Qasym-Jomart Toqaev shaǵyn formatta ótken kezdesýde qatysýshy memleketter basshylaryna Qazaqstannyń UQShU formatyndaǵy ózara is-qimyldardyń ózekti máseleleri jónindegi ustanymyn jetkizdi.
– Biz UQShU aiasyndaǵy saiasi yntymaqtastyqty damytýǵa, Uiymnyń áskeri-kúshtik áleýetin nyǵaitýǵa jáne zamanaýi syn-qaterler men qaýipterge qarsy is-qimyldar jasaýǵa niettimiz, – dedi Memleket basshysy.
Halyqaralyq qaýipsizdik salasyndaǵy saiasi dialogty kúsheitý qajettigin atap ótken Qasym-Jomart Toqaev Eýraziia kindiginde ornalasqan aýmaqtyń qaýipsizdigin qamtamasyz etý isindegi UQShU-nyń atqaratyn jaýapkershiligine nazar aýdardy. Onyń pikirinshe, Uiym Eýropa men Aziiany qaýipsizdiktiń birińǵai Eýraziialyq platformasynda bailanystyra otyryp, óz pozitsiiasyn qazirgiden de nyǵaita alatyny jóninde pikir bildirdi.
Qasym-Jomart Toqaev osy maqsatqa qol jetkizý úshin birqatar mindetti qarastyrý kerek ekenin aitty. Atap aitqanda, UQShU-nyń halyqaralyq bedelin arttyrý úshin jumys júrgizý qajettigine toqtaldy.
– Biz eshkimge qarsy shyqpaimyz, kerisinshe, ózara tiimdi dialogqa daiynbyz. Bul ustanymdy ilgeriletý mańyzdy, – dedi Memleket basshysy.
Osyǵan orai Qazaqstan Prezidenti UQShU-ǵa múshe memleketterdiń Syrtqy ister ministrleriniń NATO-daǵy áriptesterine biylǵy mamyr aiynda joldaǵan Ashyq úndeýiniń mańyzdylyǵyn atap ótip, onyń ózara senimdi nyǵaitýǵa jáne yntymaqtastyqty damytýǵa septigin tigizetinin aitty.
Qasym-Jomart Toqaev UQShU janyndaǵy Seriktes jáne Baqylaýshy institýttardy odan ári damytýdyń mańyzdylyǵyn atap ótti. Institýttardy qurý týraly sheshim byltyr Qazaqstan astanasynda qabyldanǵan bolatyn. Prezidenttiń pikirinshe, bul institýttar jumystarynyń alǵashqy nátijeleri de aitarlyqtai.
Prezident UQShU aiasyndaǵy saraptamalyq-dialogtyq infraqurylymdy keńeitýge shaqyrdy. Memleket basshysynyń aitýynsha, Ujymdyq qaýipsizdik keńesiniń aldaǵy sessiialarynyń birinde ministrler, Qaýipsizdik keńesi hatshylary, iri sarapshylar men sheteldik qonaqtar deńgeiinde halyqaralyq konferentsiia uiymdastyrý týraly oilanǵan jón.
Qasym-Jomart Toqaev Miýnhen konferentsiiasyn mysalǵa keltirdi. Onyń pikirinshe, bul jiyn bastapqyda NATO-ǵa múshe elderdiń qorǵanys vedomstvolary ókilderiniń beiresmi kezdesýi retinde uiymdastyrylǵan edi, al búginde Eýropanyń qaýipsizdigine qatysty problemalardy talqylaityn bedeldi forýmǵa ainaldy.
Memleket basshysy óz sózinde UQShU-ǵa múshe memleketter aýmaǵyndaǵy, sonyń ishinde Aýǵanstandaǵy terrorizmge qarsy is-qimyl máseleleri týraly aitty.
– Búginde resmi bilik el aýmaǵynyń jartysynan astamyn ǵana baqylaidy. Onda halyqtyń 65 paiyzy turady. Aýǵanstannyń qalǵan aimaqtary terroristik uiymdardyń qolynda. Ońtústikten tónetin osyndai qaýiptiń bar ekenin eskere otyryp, UQShU halyqaralyq terrorizm men basqa da qaterlerge qarsy kúresý úshin qarýly kúshter men quraldardy saqadai-sai ustaýy qajet, – dedi Qazaqstan Prezidenti.
Memleket basshysy Sammit qatysýshylaryna «Jýsan» arnaiy gýmanitarlyq operatsiiasynyń nátijesi týraly aityp, osy shara barysynda Qazaqstan men Siriianyń salalyq organdary 595 azamatty, onyń ishinde 400-den astam balany qaqtyǵys aimaǵynan alyp shyqqanyn jetkizdi. Prezident jýyrda ǵana Iraktan bir top balanyń qutqarylǵanyn habarlady.
Qasym-Jomart Toqaev zańsyz esirtki ainalymymen kúres, aqparattyq jáne kiberqaýipsizdik salalaryndaǵy yntymaqtastyqty nyǵaitý máselelerine nazar aýdardy.
Qazaqstan Prezidenti sóziniń sońynda UQShU-ǵa tóraǵalyq etken qyrǵyz tarapynyń jetistikteri úshin Sooronbai Jeenbekovke rizashylyq bildirip, Uiym tóraǵalyǵyn qabyldap alǵan reseilik áriptesterin quttyqtady.
Sammit qorytyndysy boiynsha UQShU-ǵa múshe memleketter basshylary jahandyq jáne óńirlik qaýipsizdikti nyǵaitý maqsatynda halyqaralyq is-qimyldar men yntymaqtastyqty jetildirý týraly saiasi málimdeme qabyldady.
Bishkekte qabyldanǵan qujattar UQShU aiasyndaǵy yqpaldastyqty odan ári nyǵaitýǵa baǵyttalǵan. Qujattar Uiymnyń ashyqtyǵyn jáne onyń ózge eldermen jáne halyqaralyq qurylymdarmen yntymaqtastyǵyn keńeitýge beiildigin kórsetedi.
Ujymdyq qaýipsizdik keńesi sessiiasynyń qorytyndysy boiynsha 17 qujatqa, sonyń ishinde, jahandyq jáne óńirlik qaýipsizdikti nyǵaitý maqsatynda halyqaralyq ózara is-qimyldar men yntymaqtastyqty jetildirý týraly málimdemege jáne Ujymdyq qaýipsizdik keńesiniń 14 sheshimine qol qoiyldy:
***
1. «1941-1945 jj. Uly Otan soǵysyndaǵy Jeńistiń 75 jyldyǵyn merekeleý jónindegi is-sharalar jospary týraly»;
2. «Ujymdyq qaýipsizdik shart uiymynyń normativtik quqyqtyq aktilerine ózgerister engizý týraly»;
3. «Ujymdyq qaýipsizdik shart uiymynyń Ujymdyq qaýipsizdik keńesi týraly Erejesine ózgerister engizý týraly»;
4. «Ujymdyq qaýipsizdik shart uiymy organdary rásimderiniń Qaǵidalaryna ózgerister engizý týraly»;
5. «Birikken Ulttar Uiymynyń Jahandyq terrorizmge qarsy strategiiasyn iske asyrý jónindegi Ujymdyq qaýipsizdik shart uiymyna múshe memleketterdiń 2019-2021 jyldarǵa arnalǵan ujymdyq is-qimyldar jospary týraly»;
6. «Tájik-aýǵan shekarasy mańyndaǵy shielenisti azaitýǵa baǵyttalǵan qosymsha sharalardyń tizbesi týraly»;
7. «Ujymdyq qaýipsizdik shart uiymyna múshe memleketterdiń qorǵanys-ónerkásiptik (áskeri-ónerkásiptik) keshenderiniń kásiporyndary men uiymdarynyń kooperatsiialyq jáne integratsiialyq bailanystaryn damytý salasyndaǵy bazalyq uiym týraly»;
8. «Ujymdyq qaýipsizdik shart uiymy aiasynda birlesken ǵylymi-zertteý jáne tájiribelik-konstrýktorlyq jumystardy uiymdastyrý ári júrgizý tártibi týraly Ereje»;
9. «Ujymdyq qaýipsizdik shart uiymyna múshe memleketterdiń aqparattyq tehnologiialar salasyndaǵy qylmystarǵa qarsy is-qimyldar jónindegi turaqty is-áreketter operatsiialary týraly Erejege ózgerister engizý týraly («PROKSI» operatsiiasy)»;
10. «Ujymdyq qaýipsizdik shart uiymy Qorǵanys ministrleri keńesi týraly Erejege ózgerister engizý týraly»;
11. «Ujymdyq qaýipsizdik shart uiymynyń 2018 jylǵa arnalǵan biýdjetiniń jumsalýy jónindegi esep týraly»;
12. «Ujymdyq qaýipsizdik shart uiymynyń 2020 jylǵa arnalǵan biýdjeti týraly»;
13. «Ujymdyq qaýipsizdik shart uiymynyń nagradalarymen marapattaý týraly»;
14. Ujymdyq qaýipsizdik shart uiymy Ujymdyq qaýipsizdik qeńesiniń kezekti sessiiasynyń ótkizilý ýaqyty men orny týraly», sondai-aq UQShU Ujymdyq qaýipsizdik júiesi jumystarynyń máselelerine qatysty basqa da qujattar.
