Foto: Akorda.kz
Prezident Qasym-Jomart Toqaev elordadaǵy «Atameken» etno-memorial kesheninde ótken Memlekettik tý kóterý rásimine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Eń aldymen, Qurmet qaraýyly rotasynyń bastyǵy rásimge daiyndyǵy jóninde Prezidentke raport berdi. Sodan keiin Memlekettik ánuran shyrqalyp, Kók bairaǵymyz kóterildi.
Prezident Qasym-Jomart Toqaev jinalǵan qaýymdy memlekettik rámizder kúnimen quttyqtap, olar egemendik pen eldiktiń eń basty belgisi ekenin atap ótti.
– Kók bairaǵymyz, Eltańbamyz jáne Ánuranymyz – kúlli halqymyzǵa qasterli nyshandar. Biz úshin táýelsizdik – eń qymbat qundylyq, al týymyzdyń asqaq jelbiregeni – asa biik mártebe. Batyr babalarymyz syn saǵatta árdaiym bir týdyń astynda jinalǵan. Bórili bairaq kúlli túrki jurtyn biriktirgen. Abylai hannyń aq týy búkil qazaqtyń basyn qosqan. Alash týy arystarymyzdyń jigerin janyp, namysyn qairaǵan. Biz babalarymyzdyń dańqty jolyn jalǵastyryp kelemiz. Bairaǵymyz Birikken Ulttar Uiymynyń tórinde tur. Ony ǵaryshkerlerimiz kók júzine kóterdi. Alpinisterimiz álemniń eń biik shyńdaryna ornatty. Sportshylar jeńis tuǵyrynan jelbiretip, Ánuranymyzdy shyrqatty. Kúlli álem Qazaq elin kók bairaǵyna qarap tanityn boldy, – dedi Memleket basshysy.
Prezident qasterli nyshandarymyzdy qurmetteý árbir azamattyń perzenttik paryzy ekenine nazar aýdaryp, búgingi saltanatty rásimniń taǵylymdyq mán-mańyzyna toqtaldy.
– Biz asyl qundylyqtarymyzdy aiaq asty etýge jol bermeimiz. Biyl memlekettik rámizderdi qorlaǵan adamdardy jazalaý sharalary kúsheitildi. Túsindirý jumystaryna erekshe kóńil bólinip jatyr. Otanshyldyq memlekettik rámizderdi qasterleýden bastalady. Biz ulttyq nyshandarymyzdy ulyqtaý arqyly óskeleń urpaqqa úlgi-ónege kórsetemiz. Olardy otansúigishtik, jasampazdyq rýhta tárbieleimiz. Sondyqtan búgingi saltanatty rásimniń taǵylymdyq, tárbielik máni airyqsha, – dedi Qasym-Jomart Toqaev.
Sonymen qatar Prezident memlekettik rámizder tarihymyzdy, ózindik bolmysymyzdy jáne halqymyzdyń jarqyn bolashaqqa umtylysyn aiǵaqtaitynyn atap ótti.
– Memlekettik rámizderde búkil Qazaqstan halqyn biriktiretin, jalpyulttyq biregeiligimizdi nyǵaitatyn qudyretti kúsh bar. Aitýly merekeler men álemdik dúbirli sport saiystarynda jeńiske jetken kezde júregimizde Otanǵa degen súiispenshilik oty laýlap, elimizge degen maqtanysh sezimi paida bolady. Kók bairaǵymyz, Eltańbamyz jáne Ánuranymyz – memleketimizdiń mártebesi, halqymyzdyń ar-namysy. Olar alǵa qarai nyq qadam basyp, biik maqsattarǵa qol jetkizý jolynda kúsh-jiger beredi, – dedi Prezident.
Saltanatty rásim barysynda joǵary áskeri oqý oryndarynyń 12 úzdik túlegi Qazaqstan Prezidenti – Qazaqstan Respýblikasy Qarýly Kúshteriniń Joǵarǵy Bas qolbasshysynyń qolynan ofitserlik shen aldy.
Shara sońynda Memlekettik kúzet qyzmetiniń, Qorǵanys jáne Ishki ister ministrlikteriniń Qurmet qaraýyly rotalary Prezident pen jinalǵan qaýym aldynan saltanatty marshpen júrip ótti.
Tý kóterý rásimine Parlament Májilisiniń tóraǵasy Erlan Qoshanov, Premer-ministr Álihan Smaiylov, Memlekettik keńesshi Erlan Qarin, Prezident Ákimshiliginiń Basshysy Oljas Bektenov, memlekettik organdar basshylary, Úkimet músheleri, Parlament depýtattary, Memlekettik rámizder men vedomstvolyq jáne olarǵa teńestirilgen ózge de nagradalar geraldikasy máseleleri jónindegi respýblikalyq komissiia músheleri, joǵary áskeri oqý oryndarynyń kýrsanttary men olardyń týystary qatysty.
