Qazaqstan Prezidenti Qasym-Jomart Toqaev BUU Bas Assambleiasynyń joǵary deńgeidegi 76-shy sessiiasy aiasynda «Pandemiiany toqtatyp, qaita jańǵyrýdy jaqsartý» dep atalǵan COVID-19 pandemiiasyna qarsy kúreske arnalǵan Jahandyq sammitte sóz sóiledi, dep habarlaidy "Ult aqparat" Aqordanyń resmi saityna silteme jasap.
Memleket basshysy óz sózinde álem sońǵy onjyldyqtarda densaýlyq saqtaý salasynyń buryn-sońdy bolmaǵan ǵalamdyq daǵdarysyna ushyraǵanyn atap ótti. Sonyń saldarynan týyndaǵan ekonomikalyq qiyndyqtar teńsizdikterdi arttyrdy jáne ǵalamdyq qoǵamdastyqtyń sharasyzdyǵyn kórsetti.
– Qalyptasqan jaǵdai jan-jaqty ári naqty sharalar qabyldaýdy talap etedi. Bizdiń basty mindetimiz – shuǵyl túrde vaktsinaǵa jahandyq qoljetimdilikti arttyrý bolýy kerek dep oilaimyn. Bul ǵalamdyq etika men birliktiń máselesi. Óitkeni vaktsinalarǵa qol jetkizýdegi ádiletsizdik halyqtyń densaýlyǵyna nuqsan keltirip qana qoimai, qoǵamdaǵy alshaqtyqty odan ári ulǵaita bermek. Biz vaktsinalardyń eki milliardtan astam dozasymen qamtamasyz etýge jáne densaýlyqqa tóngen jahandyq qaterlerden ujymdyq qorǵanysty jaqsartýǵa baǵyttalǵan jan-jaqty kúsh jumyldyrýdy quptaimyz. Dúniejúzilik «ujymdyq immýnitetke» úles qosa otyryp, Qazaqstan QazVac vaktsinasyn jasaý arqyly ekpe oilap tapqan álemdegi alǵashqy on eldiń qataryna endi, – dedi Qazaqstan Prezidenti.
Qasym-Jomart Toqaev jýyrda QazVac koronavirýstyń delta shtammyna tótep bere alatyndai kúsheitilgenin, búginde Qazaqstan halqynyń 31 paiyzy ekpeni tolyq alǵanyna toqtaldy. Sonymen qatar azamattarymyzdyń erkin tańdaý jasaýy úshin vaktsinanyń birneshe túri jetkilikti deńgeide usynylǵany týraly aitty.
– Osy sammittiń paidaly ideialary men maqsattaryn júzege asyrý úshin biz naqty ishki josparlarymyz ben mindettemelerimizdi ázirledik. Qazaqstanda ulttyq biologiialyq qaýipsizdik júiesin qurýdyń zańnamalyq negizi ázirlengen. Biz halyqaralyq standarttarǵa sáikes keletin biologiialyq qaterlerdi boljaýǵa arnalǵan keshendi ári joǵary tehnologiialyq qurylym jasaqtaýǵa umtylamyz. AQSh basshylyǵynyń kúsh-jigeri men Prezident Baidenniń «Álemdi jaqsartý» jahandyq bastamasy aiasynda seriktestikti damytý arqyly ujymdyq is-qimyldardy qamtamasyz etýge umtylysyn joǵary baǵalaimyz. Sondyqtan Qazaqstan Sizdiń usynyp otyrǵan mindetterdi bekitý týraly kózqarasyńyzben kelise otyryp, osy maqsatqa qol jetkizý úshin óz úlesin qosýǵa daiyn, – dedi Memleket basshysy.
Prezident tájiribe men ǵylymi zertteýlerge súiene otyryp, keshendi sharalardy júzege asyrý jóninde birqatar bastama kóterdi.
– Biz ǵalamdyq deńgeidegi áleýetti arttyrýǵa nazar aýdarýymyz kerek. Dúniejúzilik densaýlyq saqtaý uiymy bekitken alǵashqy meditsinalyq-sanitarlyq kómek salasyndaǵy Almaty deklaratsiiasynyń negizgi qaǵidattaryn nasihattaý qajet. Biz bolashaqta biologiialyq apattar men daǵdarystardyń aldyn alý úshin kúsh biriktirýimiz kerek. Osyny eskere otyryp, byltyr men Biologiialyq qaýipsizdik jónindegi halyqaralyq agenttik qurý týraly bastama kóterdim. Barlyq múddeli taraptarmen tájiribelik konsýltatsiialar júrip jatyr. Biz seriktesterdi osy bastamany qoldaýǵa shaqyramyz, – dedi Qasym-Jomart Toqaev.
Memleket basshysy jahandyq týrizm men bizneske COVID-19 pandemiiasymen kúreste kómektesý úshin vaktsina sertifikattaryn ózara moiyndaý baǵytynda jumys isteý mańyzdy ekenin atap ótti.
– Meditsinalyq sertifikattar pandemiiadan keiingi kezeńde jumysty qaýipsiz qaita qalpyna keltirýge, ekonomikanyń tez ońalýyna jáne jańa jumys oryndarynyń ashylýyna yqpal etedi. Biz COVID-19 vaktsinalaryna degen senimdi arttyrý úshin áleýmettik jelilerdiń quraldaryn qoldanýymyz kerek. Mass-mediadaǵy ǵylymi negizdelgen aqparattardyń tapshylyǵynan qoǵamda kúmán nemese senimsizdik bar. Biz halyqtyń vaktsinaǵa degen senimin arttyrý úshin túsindirý jumystarynda naqty derekterge súienýimiz kerek.
Biz shynymen de jaqsy álem qurýymyz kerek, sonymen qatar ádil, ornyqty, ekologiialyq taza jáne izgilikke negizdelgen «jańa álem» qalyptastyrǵan abzal, – dedi BUU sammitinde sóilegen sózinde.
