Foto: Akorda.kz
Prezident AQSh Senaty Ulttyq qaýipsizdik jáne Úkimet isteri jónindegi komitetiniń tóraǵasy Geri Pitersti qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysy senatorǵa iltipat bildire otyryp, onyń sapary ekijaqty yntymaqtastyq máseleleri boiynsha jan-jaqty pikir almasýǵa jaqsy múmkindik ekenin atap ótti.
– Amerika Qurama Shtattary jahandyq qaýipsizdikti nyǵaitý, iadrolyq qarýdy taratpaý, ekonomikalyq turaqtylyqty qamtamasyz etý jáne demokratiialyq qundylyqtardy ilgeriletý isinde árdaiym bizdiń elimizdiń strategiialyq seriktesi sanalǵan. Biz kóp nársege qol jetkizdik oilaimyn. Áitse de eki eldiń múddesine sai keletin salalardaǵy ózara yntymaqtastyǵymyzdy nyǵaitý úshin alǵa qarai jyljýymyz kerek, – dedi Prezident.
Áńgimelesý barysynda Qasym-Jomart Toqaev biyl qyrkúiek aiynda BUU Bas Assambleiasy alańynda «S5+1» formatynda ótetin AQSh pen Ortalyq Aziia memleketteri basshylarynyń alǵashqy sammitine shaqyrǵany úshin Prezident Djo Baidenge rizashylyǵyn bildirdi.
Óz kezeginde senator Geri Piters Amerika Qurama Shtattary men Qazaqstan arasyndaǵy qarym-qatynasqa qatysty negizgi máselelerdi talqylaý múmkindigi úshin Qasym-Jomart Toqaevqa alǵys aitty.
– Ortalyq Aziia – álemniń mańyzdy bóligi, al Qazaqstan – Ortalyq Aziia óńirindegi negizgi memleketterdiń biri. Sondyqtan biz aldaǵy ýaqytta yntymaqtasa jumys isteýge múmkindigimiz bar ekenine kóz jetkizgimiz keledi. Bul pikirimdi Prezident Baiden de quptaidy dep oilaimyn. Ol Sizben taiaý ýaqytta Niý-Iorkte kezdesýge nietti. Bul kezdesý bizdiń qarym-qatynasymyzdy nyǵaitýǵa oń yqpal etedi dep oilaimyn, – dedi AQSh senatory.
Kezdesý barysynda sondai-aq halyqaralyq jáne óńirlik kún tártibindegi ózekti máseleler talqylandy.
