Elordada ótken Qazaqstan Respýblikasynyń prezidentin ulyqtaý rásiminde Qasym-Jomart Toqaev saiasi kózqarastary men ustanymdaryna qarai eshkimdi bólip-jarmaitynyn aitty.
"Men prezident retinde elimizdiń árbir azamatynyń múddesin qorǵaimyn jáne ol meniń basty maqsatym. Olardy saiasi kózqarastary men ustanymdaryna qarai bólýge jol bermeimin. Túrli saiasi uiymdar men qoǵam qairatkerlerinen kelip túsken usynystardy, bastamalardy men aldaǵy ýaqytta mindetti túrde eskeremin. Ashyq jáne ádil jumys isteimin. Biz úshin – eń basty mindet zańǵa sai adal qyzmet etý. Bizdiń bir ǵana otanymyz bar! Taǵdyrymyz bir! Halqymyzdyń bolashaǵy úshin birge eńbek etemiz", - dedi Q.Toqaev.
Prezident sonymen qatar qoǵamdyq senim ulttyq keńesi qurylatynyn aitty.
"Bilik pen qoǵam arasyndaǵy dialogtyń mańyzy zor. Ár túrli pikirler bola beredi, biraq birtutas qoǵam kerek. Sol úshin men qoǵamdyq senim ulttyq keńesin qurý jóninde sheshim qabyldadym. Keńes elimizdegi eń mańyzdy máselerdi talqylaidy. Onyń quramyna birinshi kezekte jastar kiredi. Alǵashqy otyrys tamyz aiynda ótedi", – dedi memleket basshysy.
Aita keteiik, 9 maýsymda ótken kezekten tys prezident sailaýynda "Nur Otan" partiiasy atynan túsken Qasym-Jomart Toqaev sailaýshylardyń 70, 96 % daýysyn jinap, jeńiske jetken bolatyn.
Eske salaiyq, Konstitýtsiiaǵa sáikes Qazaqstan Respýblikasynyń Prezidenti bes jyl merzimge sailanady.
