Qasym-Jomart Toqaev Qazaqstan Respýblikasy Ishki ister ministrligi Ulttyq ulan qurylymynyń Almaty oblysyndaǵy Jaýyngerlik jáne ádistemelik daiyndyq ortalyǵynda ótken «Qaisar-2021» jedel-taktikalyq oqý-jattyǵýlaryna bardy, dep habarlaidy "Ult aqparat" Aqordaǵa silteme jasap.
Memleket basshysyna arnaiy jasaq qyzmetkerleriniń qoian-qoltyq urysqa daiyndyǵy kórsetildi. Prezident jattyǵý júieleri, biikke órmeleý qabyrǵalary jáne oqý ortalyǵynyń mýltimediialyq myltyq atý poligonyn aralady.
Joǵarǵy Bas qolbasshy áskeriler aldynda sóilegen sózinde Qazaqstannyń myqty memleket bolyp qalyptasýyna quqyq qorǵaý organdary eleýli úles qosyp jatqanyn atap ótti.
– Sizderdiń qajyrly eńbekterińizdiń arqasynda elimizde qoǵamdyq qaýipsizdik berik ornyqty. Qylmyspen kúresip, azamattardyń alańsyz tirshiligin qamtamasyz etý – táýekeli kóp jumys. Tártip saqshysy kez-kelgen ýaqytta qaterdiń betin qaitarýǵa daiyn turýǵa tiis. Bul zor jaýapkershilik pen tózimdilikti talap etedi. Politsiia qyzmetkerleri qashanda qyraǵy ári shiraq bolýy kerek. Sondyqtan, osyndai oqý-jattyǵýlar kásibi sheberlikti shyńdaý úshin óte mańyzdy, – dedi Qasym-Jomart Toqaev.
Prezident quqyq qorǵaý organdarynda qyzmet etý fizikalyq jáne psihologiialyq qysymǵa ushyratady, tipti, keide jeke ómirine de qaýipti ekenine toqtaldy.
– Táýelsizdik jyldarynda ishki ister organdary men Ulttyq ulannyń áskeri qyzmetshileri qatarynan, barlyǵy 802 azamat qyzmettik mindetterin oryndaý barysynda qaza tapty. Olar ómiriniń sońyna deiin antyna adal boldy. Erlerdiń esimi máńgi umytylmaidy. Janqiiarlyǵy men batyrlyǵy úshin 1567 qyzmetker ordendermen jáne medaldarmen marapattaldy, – dedi Memleket basshysy.
Joǵarǵy Bas qolbasshy quqyq qorǵaý organdary salasyndaǵy shtattyq qyzmetkerlerdiń áleýmettik jaǵdaiyn jaqsartý máselesine toqtaldy.
– Aldaǵy úsh jylda ishki ister organdary qyzmetkerleriniń laýzymdyq eńbekaqysy orta eseppen 30 paiyzǵa ósedi. Osy maqsatqa jumsaýǵa 100 milliard teńgeden astam qarjy qarastyrylǵan. Ulttyq ulan sarbazdarynyń ailyq jalaqysy birtindep ósip keledi. 2021-2023 jyldary ofitserlerdiń jalaqysy 70 paiyzǵa, kelisimshart boiynsha qyzmet etetin áskerilerdiń eńbekaqysy 60 paiyzǵa jýyq artady. 2024 jyldyń sońyna deiin arnaiy kúshterde qyzmet etetinder men kelisimshart boiynsha qyzmet artqaryp júrgenderdiń bári ofitser shenin alady. Jyl saiyn turǵyn úige qomaqty qarajat jumsalyp keledi. Qazirgi kezde 24 myń politsiia qyzmetkeri men 13,5 myńnan astam áskeri qyzmetshige turǵyn úi tólemderi berilip turady. Qoǵamdyq tártip pen qaýipsizdikti kúzetetin qyzmetkerlerge jan-jaqty áleýmettik qoldaý kórsetý bizdiń memleketimizdiń basymdyqtarynyń biri bolyp qala beredi, – dedi Qazaqstan Prezidenti.
Qasym-Jomart Toqaev búgingi jedel-taktikalyq jattyǵýlarǵa baǵa bere kele, Ishki ister ministrligi túrli daǵdarystardyń aldyn alýǵa jáne jolyn kesýge tas túiin daiyn ekenderin kórsetti dedi. Memleket basshysy osy jetistiktermen toqtap qalýǵa bolmaitynyn, halyqaralyq ozyq tájiribeni muqiiat zerdelep, otandyq mamandardy daiyndaý júiesin dáiekti túrde jetildirý qajet ekenine toqtaldy.
– Halyqaralyq ahýaldyń shielenisýi jaǵdaiynda bizdiń kúshtik qurylymdar meiilinshe utqyr bolýǵa tiis. Aýǵanstandaǵy jaǵdaiǵa bailanysty qoǵamda alańdaýshylyq artyp kele jatqanyn kórip otyrmyz. Bul oqiǵalar Qazaqstanǵa tikelei qaýip tóndirmeidi. Alaida belgili bir dárejede qateri bar. Sondyqtan biz jaǵdaidy muqiiat baqylap, kez kelgen syn-qaterge laiyqty jaýap berýge daiyn bolýymyz kerek, – dedi Joǵarǵy Bas qolbasshy.
Qasym-Jomart Toqaev kúshtik qurylymdar qyzmetkerleriniń aldynda sóilegen sózinde jas urpaqtyń solarǵa qarap boi túzeitinin eskertti.
– Barshańyz tártip saqshysy degen abyroily atqa laiyq bolýlaryńyz kerek. Sizderge beriletin eń joǵary baǵa – halyqtyń senimi men alǵysy. Ishki ister organdarynyń qyzmetkerleri osy senimdi aqtaidy dep senemin, – dedi Memleket basshysy.
Joǵarǵy Bas qolbasshyǵa Ishki ister ministri Erlan Turǵymbaev vedomstvo qyzmetkerleriniń qoǵamdyq qaýipsizdikti qamtamasyz etý boiynsha tapsyrmalardy oryndaýǵa daiyndyǵy týraly baiandap, arnaiy, áskeri tehnikalar men qarý-jaraqtardyń úlgilerin kórsetti.
