Qazaqstan Prezidenti Álemdik jáne dástúrli dinder kóshbasshylary VII seziniń jabylý rásimine qatysty, - dep habarlaidy "Ult aqparat" Aqordaǵa silteme jasap.
Álemdik jáne dástúrli dinder kóshbasshylary VII seziniń jabylý rásiminiń aldynda Qorytyndy deklaratsiia jariialandy.
Qasym-Jomart Toqaev forýmnyń eki kúndik jumysyn qorytyndylai kele, qazaq jeri osy kúnderi túrli mádenietterdiń syndarly suhbat ortalyǵyna ainalǵanyn atap ótti. Dúniejúziniń bedeldi dinbasylary osy jerde bir shańyraqtyń astyna jinaldy.
"Shyn máninde, bárimizdiń maqsatymyz – bir. Bul – órkenietter úndestigin ornatý jáne beibitshilik pen turaqtylyqty nyǵaitý. Sezde kóptegen salmaqty oi, saliqaly pikir aityldy. Onyń bári bizdiń úilesimdi álem qurý jolyndaǵy is-áreketimizge oń yqpalyn tigizedi dep sanaimyn. Bizdiń bastamamyzǵa qoldaý kórsetip, Sezge arnaiy kelgen dini kóshbasshylarǵa, saiasatkerler men halyqaralyq uiym ókilderine alǵys aitamyn. Sondai-aq forýmdy ótkizýge belsene atsalysqan diplomattarǵa, volonterlerge, jýrnalister men basqa da azamattarǵa rizashylyǵymdy bildiremin", – dedi Memleket basshysy.
Prezident Qazaqstan halqynyń jáne jeke óziniń atynan Rim Papasy Frantsiskke elimizge tarihi sapar jasap, Sezd jumysyna qatysqany úshin taǵy da rizashylyǵyn bildirdi.
"Sizdiń álemdik qoǵamdastyqqa úndeýińiz búkil álemdegi milliondaǵan adamdarǵa úmit pen senim syilady", – dedi Memleket basshysy.
Qazaqstan Prezidenti Álemdik jáne dástúrli dinder kóshbasshylarynyń VII sezi tarihtyń betburys kezeńinde ótkenine toqtaldy. Pandemiiadan keiin geostrategiialyq jaǵdai ýshyqqan kezde jahandyq deńgeide órkenietaralyq dialog pen senimdi nyǵaitý úshin jańa ádister izdeý asa mańyzdy. Prezident forýmnyń qorytyndysy bul basty mindetti sheshýge eleýli úles qosady dep sanaidy.
"Biz birlese otyryp, ulttardyń birin-biri shettetýine, memleketterdiń kúireýine jáne halyqaralyq qatynastar júiesiniń buzylýyna yqpal etetin "kúsh kórsetý saiasaty" men "arazdyq tilin" dáripteýdi synǵa aldyq. Búginde dinderdiń bitimgerlik áleýetin paidalanyp, uzaq merzimdi turaqtylyqqa qol jetkizý úshin rýhani kóshbasshylardyń kúsh-jigerin biriktirý buryn-sońdy bolmaǵan mańyzǵa ie. Barlyq dinniń negizinde gýmanistik idealdar, adam ómiriniń joǵary qundylyqtary, beibitshilik pen jasampazdyqqa umtylý siiaqty izgi amaldar jatady. Osy negizgi qaǵidattar rýhani salada ǵana emes, sondai-aq memleketterdiń áleýmettik-ekonomikalyq damýy men halyqaralyq saiasatta da kórinis tabýy qajet", – dedi Qasym-Jomart Toqaev.
Sonymen qatar Memleket basshysy ulttyq kúizelister men jahandyq daǵdarystardyń qainar kózi sanalatyn teńsizdiktiń barlyq túrin eńserý talqylanǵan negizgi máselelerdiń biri bolǵanyn atap ótti. Tsifrlyq jáne genderlik problemalarǵa, áleýmettik bólinisterdi joiý isindegi bilim men dini aǵartý salasynyń atqaratyn róline basa mán berildi.
Qazaqstan Prezidenti ekonomikalyq ósim men rýhani-adamgershilik damýdyń arasyndaǵy teńdikke qol jetkizý joldaryn qarastyrý áli de ózekti ekenin atap ótti.
"Dinder kóshbasshylary rýhani jáne tehnologiialyq damýdy úilesimdi ushtastyrý qajet ekenin dáleldei alatynyna senimdimin", – dedi Prezident.
Qasym-Jomart Toqaev rýhani kóshbasshylardyń bedeli búkil adamzattyń igiligi úshin qazirgi álemdegi qaishylyqtardy eńserýge septigin tigizetinine senimdi.
Memleket basshysy Sezdiń qorytyndy qujatyna erekshe nazar aýdardy. Prezident forým qorytyndysy boiynsha búgin mazmundy ári jan-jaqty pysyqtalǵan Deklaratsiia qabyldanatynyn jetkizdi. Onyń aitýynsha, bul mańyzdy kontseptýaldy qujat irgeli máselelerdi qamtidy jáne úkimetterge, saiasi kóshbasshylarǵa, halyqaralyq uiymdarǵa baǵdar bere alady.
"Bizdiń ortaq mindetimiz – Deklaratsiianyń kontseptýaldy erejeleri men ideialaryn dáiekti túrde ilgeriletý. Sonymen qatar Álemdik jáne dástúrli dinder kóshbasshylary sezin damytýdyń 2023-2033 jyldarǵa arnalǵan tujyrymdamasyn ázirleý qajet. Qujatta bizdiń forýmnyń yqpalyn odan ári kúsheitýdiń naqty qadamdary men kezeńderi qamtylýy kerek", – dedi Memleket basshysy.
Qasym-Jomart Toqaev sózin qorytyndylai kele, Qazaqstan óziniń ishki jáne syrtqy saiasatynyń basymdyqtaryna sáikes, Sezdiń dáiekti qyzmetin tolyqtai qoldaitynyn atap ótti.
Sonymen qatar, Sezdiń jabylý rásiminde Rim Papasy Frantsisk, "Ál-Azhar" ýniversitetiniń Joǵarǵy imamy sheih Ahmad at-Taieb, Máskeý Patriarhatynyń Syrtqy shirkeýlik bailanystar departamentiniń tóraǵasy, Volokolamsk mitropoliti Antonii, Saýd Arabiiasy Koroldiginiń Islam isteri, ýaǵyz jáne nasihat jónindegi ministri sheih Abdýllatif ben Abdýlaziz Abdrahman Ál ash-Sheih, Izraildiń Bas ashkenaz ravvini David Laý, sondai-aq Álemdik jáne dástúrli dinder kóshbasshylary sezi Hatshylyǵynyń basshysy – Qazaqstan Respýblikasy Parlament Senatynyń tóraǵasy Máýlen Áshimbaev sóz sóiledi.
