Foto: Akorda.kz
Prezident Aqtóbe oblysynyń ákimi Eraly Toǵjanovty qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna óńirdiń byltyrǵy áleýmettik-ekonomikalyq damýy jóninde esep berilip, osy jylǵa arnalǵan jospary tanystyryldy.
Eraly Toǵjanovtyń aitýynsha, Aqtóbe oblysynda turaqty makroekonomikalyq jaǵdai qalyptasqan. Ónerkásip, aýyl sharýashylyǵy, investitsiia jáne turǵyn úi qurylysy salalaryndaǵy negizgi áleýmettik-ekonomikalyq kórsetkishterdiń ósimi qamtamasyz etilgen.
Prezidentke investitsiia tartý jónindegi sharalar týraly baiandaldy. Ótkizilgen investitsiialyq forýmdardyń nátijesinde tek sońǵy úsh aida jalpy quny 3 trillion teńgeden asatyn 12 memorandýmǵa qol qoiyldy. Sondai-aq óńirdiń ekologiialyq ahýalyn jaqsartý jumystary jandana tústi.
Budan bólek, agroónerkásip kesheni men aýyldyq jerlerdi damytýǵa qatysty Prezident tapsyrmasynyń oryndalýy jóninde málimet berildi. Oblys ákimi óńirdegi 315 eldi mekendi keshendi túrde damytý tujyrymdamasy ázirlenip jatqanyn jetkizdi. Aimaqta «Aýyl amanaty» jobasy júzege asyrylyp jatyr. Jobany qarjylandyrýǵa 2022 jyly respýblikalyq biýdjetten 3 milliard teńge, biyl qosymsha 3,5 milliard teńge bólingen.
Sonymen qatar «Bilim All» jobasy aiasynda 10 myńǵa jýyq bala oqityn 120 shaǵyn jinaqty aýyl mektebiniń bilim sapasyn arttyrý sharalary qabyldanyp jatyr.
Kezdesý sońynda Prezident óńir infraqurylymyn damytý jáne oblys turǵyndaryn alańdatatyn áleýmettik máselelerdi sheshý jumystaryn jalǵastyrýdy tapsyrdy.
