Foto: Akorda.kz
Qasym-Jomart Toqaev Meditsinalyq-sanitariialyq alǵashqy kómek (MSAK) jónindegi Almaty deklaratsiiasynyń qabyldanǵanyna 45 jyl jáne Astana deklaratsiiasyna 5 jyl tolýyna orai uiymdastyrylǵan jahandyq konferentsiianyń plenarlyq otyrysyna qatysty, - dep habaralidy "Ult aqparat" Aqordaǵa silteme jasap.
Memleket basshysy konferentsiia qatysýshylaryna iltipat bildire otyryp, densaýlyq saqtaý jáne meditsinalyq-sanitariialyq alǵashqy kómek kórsetýdiń halyqaralyq júiesin jetildirý isinde Almaty jáne Astana deklaratsiialarynyń mańyzy zor ekenin atap ótti.
– Osydan 45 jyl buryn meditsinalyq-sanitariialyq alǵashqy kómektiń áleýmettik turǵyda ádiletti modeline negiz bolǵan Almaty deklaratsiiasy qabyldandy. Bul deklaratsiia álemdik densaýlyq saqtaýdyń Uly Hartiiasyna ainalyp, kóptegen eldiń halyq densaýlyǵyn jaqsartý úshin shara qabyldaýyna, ony adamnyń irgeli quqyǵy retinde moiyndaýyna túrtki boldy. Almaty deklaratsiiasy biraz elde ana men bala óliminiń deńgeiin júieli túrde tómendetý, boljamdy ómir súrý jasyn uzartý úshin sheshýshi ról atqardy. Búginde kóptegen elde ulttyq densaýlyq saqtaý júiesi jolǵa qoiylǵan. Onda meditsinalyq-sanitariialyq alǵashqy kómekke airyqsha mán beriledi. Bul bes jyl buryn qol qoiylǵan Astana deklaratsiiasynda naqtylanady, – dedi Prezident.
Qasym-Jomart Toqaevtyń aitýynsha, MSAK júiesi epidemiianyń alǵashqy belgilerin anyqtaý jáne tosyn syn-qaterlerge qarsy áreket etý isinde mańyzdy ról atqarady. Memleket basshysy qoǵamdyq densaýlyq saqtaý uiymdary ózderiniń ornyqtylyǵyn jáne týyndaǵan jaǵdaiǵa tez beiimdele alatynyn kórsetkenine nazar aýdardy. Prezident adamzattyń COVID pandemiiasyn eńserýine úles qosqany úshin barlyq meditsina qyzmetkerine alǵys aitty.
Bul rette, Prezidenttiń pikirinshe, barlyq yqtimal qaýip-qaterdi eskere otyryp, densaýlyq saqtaý júiesi kez kelgen kúrdeli jaǵdaiǵa árdaiym daiyn bolýy úshin oǵan qoldaý kórsetý kerek. Aýrý-syrqaýdyń belgilerin bastapqy kezeńinde anyqtaý jáne tosyn syn-qaterlerge der kezinde nazar aýdarý úshin áleýetti arttyra berý qajet.
Qasym-Jomart Toqaev elimizdegi densaýlyq saqtaý júiesin damytý baǵytynda júzege asyrylyp jatqan sharalarǵa arnaiy toqtaldy.
– Elimizde barlyq balany profilaktikalyq meditsinalyq tekserýden ótkizý isi jolǵa qoiylǵan. Árbir iri eldi mekende jastardyń densaýlyq ortalyqtary jumys isteidi deýge bolady. Jyl saiyn úsh millionǵa jýyq eresek adam skrining jáne kásibi tekserý baǵdarlamasynan ótedi. Aýyl turǵyndarynyń meditsinalyq qyzmet alýyna birdei múmkindik jasaý úshin biz birqatar reforma júrgizdik. Nátijesinde, 2018 jyldan bastap aýyldardaǵy alǵashqy kómek kórsetý pýnktteriniń sany 3 eseden astam kóbeidi. Sonymen qatar telemeditsina jáne qashyqtan monitoring jasaý siiaqty tsifrlyq tehnologiialar belsendi túrde engizilip jatyr. Bul alǵashqy meditsinalyq kómektiń qoljetimdiligin aitarlyqtai arttyrady, – dedi Memleket basshysy.
Prezident sózin qorytyndylai kele, Dúniejúzilik densaýlyq saqtaý uiymynyń qoldaýymen Memleketterdiń meditsinalyq-sanitariialyq alǵashqy kómek jónindegi koalitsiiasyn qurýdy usyndy. Bul birlestik densaýlyq saqtaý jáne aýrýdyń aldyn alý qaǵidattaryn odan ári ilgeriletýge, meditsinalyq-sanitarlyq alǵashqy kómekti damytý jónindegi birlesken usynymdar ázirleýge múmkindik beredi.
Sondai-aq Qasym-Jomart Toqaev meditsinalyq-sanitariialyq alǵashqy kómek kórsetý salasyn, jalpy densaýlyq saqtaý júiesin odan ári damytýda jastarǵa zor senim artatynyn atap ótti. Memleket basshysy jastarmen kezdesken saiyn sportpen shuǵyldanýdyń mańyzdylyǵy týraly aitatynyn eske salyp, olardy eńbekqor jáne maqsattaryna adal bolýǵa shaqyrdy.
Sonymen qatar konferentsiianyń plenarlyq otyrysynda DDU Bas direktory Tedros Adhanom Gebreiesýs, DDU-nyń Eýropadaǵy óńirlik biýrosynyń basshysy Hans Kliýge, Toronto densaýlyq saqtaý júiesi ýniversiteti MSAK Seriktestik keńsesi jahandyq bóliminiń jetekshisi Ketrin Rýlo sóz sóiledi.
