Áleýmettik jelide qazaqtyń qazirgi toi mádenietine qatysty pikirtalas qyzdy. Facebook qoldanýshysy Tortýyl Shoqan qazirgi toilardyń shyǵyny men qonaq sanyna bailanysty óz oiyn bildirdi, dep habarlaidy ult.kz.
Onyń aitýynsha, buryn aýqatty adamdar toidy el ishindegi mártebesin kórsetý úshin ótkizse, qazir kei otbasylar toidy qonaqtardyń esebinen ótkizýge tyrysady.
«Qazir qyzdy turmysqa berý, uldy úilendirý — amalsyz ótkizilýi tiis is-sharalar qatarynan. "Kisi sany neǵurlym kóp bolsa, soǵurlym toi ózin aqtaidy" támsili — qupiia jospardyń úlken bóligi», — dep jazdy ol.
Avtordyń pikirinshe, ásirese ońtústik óńirlerde birneshe týystyń qatarynan ótetin toilar da osy túsinikpen bailanysty.
Ol óz jazbasynda toi jasaý úshin qaryzǵa batyp nemese qolda bar mal-múlkin satýǵa májbúr bolǵan adamdardy da mysalǵa keltirdi.
«Kórshi aýylda turatyn bir tanys baýyr, alty ai buryn qashyp ketken qyzyna toi jasaimyn dep 4 siyryn, jalǵyz atyn arba-shana, qamyt-saimanymen satty», — dep jazdy avtor.
Tortýyl Shoqan toiǵa shaqyrylatyn qonaqtar sanyn da shekteý kerek dep esepteidi. Onyń usynysy boiynsha, qyz uzatýǵa 100 adamnan, al ul toiyna 200 adamnan artyq shaqyrmaǵan jón.
«Sonda ǵana toi mándi, sándi, shyǵynsyz bolmaq», — deidi ol.
Avtor oqyrmandardy bul máselege qatysty óz pikirin bildirýge shaqyrdy.
Oqi otyryńyz: «Sońyna deiin shashylaiyq»: Tanymal bloger toibastarǵa brilliant taratty
