Foto: primeminister.kz
Aqtóbe oblysynyń ákimi Eraly Toǵjanov áleýmettik jelide taraǵan aqparatqa qatysty túsinikteme berdi. Oǵan sáikes, jaqynda oblys ákiminiń mereitoiy eń qymbat meiramhanada toilandy, dep habarlaidy Sputnik Qazaqstan.
13 mamyrda Toǵjanov 60 jasqa keldi. Osydan keiin áleýmettik jelide ákimniń mereitoiy Aqtóbe qalasyndaǵy eń qymbat meiramhana - "Arovana Grand Parkte" toilanǵany týraly aqparat tarady. Al sheneýnikter oǵan qyzmettik kólikpen barǵan.
Búgin Toǵjanov prezident janyndaǵy ortalyq kommýnikatsiialar qyzmetinde Aqtóbe oblysynyń damýy týraly esep berdi. Sol kezde jýrnalister jelide taraǵan aqparat týraly surady. Ákim ony joqqa shyǵardy.
"Bizde otbasylyq bir dástúr bar. Týǵan kúndi ádette 12-sinen 13-ine qaraǵan túni toilaimyz. Sol kezde balalarym da, dostarym da quttyqtaidy. Mańǵystaýda da solai boldy. Áli esimde, 2018 jyly men Astanada bolǵanda olar eshteńe aitpai, 12-si kúni ushaqpen ushyp keldi. Sondyqtan men ol kúndi úide otbasymen birge toilap otyramyn", - dedi Toǵjanov.
Onyń aitýynsha, biyl 13 mamyrda jumys saparymen Qobda aýdanyna bardy. Ol jaqta birqatar qurylys nysandaryn kórip, tústen keiin sporttyq sharalarǵa qatysty.
"Sol kúni keshki saǵat 8-ge deiin jumys istedim. Adamdar meni mindetti túrde bir jerde toilaýy kerek dep oilaityn shyǵar. Al bireýler qyzmettik kólikterdi kórse, ony arnaiy qyzmetter tekseredi. Oǵan qatysty tapsyrma berdim. Biraq mendegi aqparat boiynsha ol kúni birde-bir memlekettik kólik esh jerde bolmaǵan, bolýy da múmkin emes", - dep atap kórsetti oblys ákimi.
