QR Premer-Ministriniń orynbasary Eraly Toǵjanov Jer reformasy jónindegi komissiianyń naqty mindetin atady, dep habarlaidy "Ult aqparat".
«Búgingi keńesimizdiń ultymyz úshin qasietti kúnderimen tuspa-tus kelýde de tegin emes dep oilaimyz. Halqymyz úshin jer - kásiptiń kózi. Sondyqtan da ol erekshe baǵaly uǵym. «Jer - yrystyń kindigi, eńbek - yrystyń qazyǵy, birlik - yrystyń tizgini» dep babalarymyz tegin aitpaǵan. Osynda aitylǵan oidyń bul da bir búgin naqty dáleli dep aitýǵa tolyqtai negiz bar», - dedi komissiianyń birinshi otyrysyn ashqan QR Premer-Ministrdiń orynbasary.
Sonymen qatar ol 2016 jyly aýyl sharýashylyǵy jerlerin qazaqstandyqtarǵa jekemenshikke, sheteldikterge, sheteldik zańdy tulǵalarǵa jáne sheteldik úlesi bar qazaqstandyq zańdy tulǵalarǵa jalǵa berýge moratorii engizilgenin atap ótti.
«25 aqpandta ótken Ulttyq qoǵamdyq senim keńesiniń 5-otyrysynda QR Prezidenti Qasym-Jomart Toqaev aýyl sharýashylyǵy jerlerin sheteldikterge jáne sheteldik kompaniialarǵa, azamattyǵy joq adamdarǵa, halyqaralyq qatysýy bar ǵylymi ortalyqtarǵa, sondai-aq qandastarǵa berýge tolyqtai tyiym salý týraly saiasi sheshimin jariialady. Bul boiynsha zań jobasy 12 naýryzda Parlamentke engizildi. Memleket basshysynyń tapsyrmasyna sáikes, jer zańnamalaryn jetildirý maqsatynda Premer-Ministrdiń ókimimen jer reformasy jónindegi komissiia quryldy», - dedi ol.
Úkimet basshysynyń aitýynsha, komissiia quramyna aýyl sharýashylyǵy salasyndaǵy qaýymdastyqtar men birlestikterdiń ókilderi, agrobiznestegi bedeldi azamattar, sonymen qatar QR Parlamenti depýtattary, jergilikti atqarýshy organdar ókilderi, ulttyq qoǵamdyq senim keńesiniń músheleri, «Atameken» UKP ókilderi, qoǵam qairatkerleri, saiasatkerler, jýrnalister enip otyr. Komissiia 80 adamnan turady. Onyń 60 paiyzy azamattyq oǵam ókilderi jáne táýelsiz sarapshylar.
«Komissiianyń aldynda aýyl sharýashylyǵy maqsatyndaǵy jer qatynastary salasyn damytý máselesi boiynsha usynymdy ázirleý mindeti tur. Sondyqtan el basshylyǵy, búkil elimiz, ásirese kásibi jermen tikelei bailanysty aýyl sharýashylyǵy ónimderin óndirýshiler kútip otyrǵanyn eskerip, aqyldasyp, naqty sheshim qabyldaityndyǵymyzǵa kúmin joq», - dedi Eraly Toǵjanov.
