Biýdjet salasy jáne kvazimemlekettik sektordyń 1 mln-nan asa qyzmetkeriniń, sondai-aq memleketten qoldaý alatyn biznestiń 2,8 mln jumysshysynyń jalaqysyn kóterý eskerilgen. Bul týraly Májilistiń jalpy otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Depýtattardyń óńirge sapary barysynda kóterilgen eki myńǵa jýyq suraqtar Úkimet tarapynan jan-jaqty saraptalyp, qaraldy. Bul suraqtardyń negizgi taqyryby Úkimetke azamattardan tikelei kelip túsken 1800 ótinishte baiandalǵan talap tilektermen sáikes kelip otyr. Demek, bul óńir turǵyndary sheshimin kútip turǵan ózekti máseleler. Olar boiynsha memlekettik apparattyń jan-jaqty zerdelengen sheshimi qajet. Bul suraqtardyń sheshimi búgingi otyrysqa qatysyp otyrǵan Úkimet músheleri jumysynyń kún tártibine engizilip, ministrlerdiń óńirlerge saparlary aiasynda naqty qaralatyn bolady. Bul baǵytta depýtattyq korpýsty birlese jumys jasaýǵa shaqyramyz. Osy oraida «Jańa Qazaqstannyń kún tártibi – azamattardyń ál-aýqatyn arttyrý, tabys tapshylyǵyn joiý, jumys oryndaryn qurý jáne infliatsiiany tejeý» degen Memleket basshysynyń sózi búgingi kúni aldymyzda turǵan negizgi mindet ekenin atap aitqym keledi», - dedi E. Toǵjanov.
Onyń aitýynsha, suraqtardyń negizgi blogy – naqty tabysty arttyrýǵa, kedeilik deńgeiin tómendetýge qatysty.
«Pandemiia, jahandyq ekonomikalyq daǵdarys halyqtyń kirisiniń tómendeýine áser etti. Memleket basshysynyń tapsyrmasyna sáikes ázirlengen Halyq tabysyn arttyrý baǵdarlamasynda azamattar kirisin kóterýge baǵyttalǵan naqty sharalar qarastyrylǵan. Birinshiden – bul biýdjet salasy jáne kvazimemlekettik sektordyń 1 mln-nan asa qyzmetkeriniń, sondai-aq memleketten qoldaý alatyn biznestiń 2,8 mln jumysshysynyń jalaqysyn kóterý. Ekinshiden, ekonomikanyń barlyq salalarynda jańadan ashylatyn 2 mln jumys oryndarynyń tabysyn arttyrý. Onyń ishinde buryn syrttan ákelingen, óndiriste suranysqa ie taýarlardyń 19 túri boiynsha jańa kásiporyndar qurý. Farmatsevtika, biotehnologiia, IT-tehnologiia jáne munai-himiia salasynda shikizaty joǵary – 5-shi jáne 6-shy deńgeide óńdeýge negizdelgen óńdeýshi ónerkásipti damytý arqyly iske asyralady. Úshinshiden, iri kásiporyndar ainalasynda shaǵyn jáne orta biznes beldeýin qurý arqyly kásipkerlikten túsetin tabysty arttyrý», - dedi Úkimet basshysynyń orynbasary.
Tórtinshiden, «Baqytty otbasy» siiaqty jobalar arqyly kóp balaly jáne múgedek bala tárbielep otyrǵan analarǵa jyl saiyn 20 myń jumys oryndaryn qurý eskerilgen. Munymen qosa, «Jastar praktikasy», «Birinshi jumys orny» jobalary jáne (400 ailyq eseptik kórsetkish kóleminde) granttar berý arqyly 160 myń jasty jumysqa tartý.
