QR Ishki ister ministrligi «TMD qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaitarýdy qamtamasyz etýdegi yntymaqtastyǵy týraly kelisimge» qandai ózgerister engenin túsindirdi, dep habarlaidy QazAqparat.
«1 sáýirde Memleket basshysy «TMD-ǵa qatysýshy memleketterdiń avtokólik quraldaryn urlaýǵa qarsy kúrestegi jáne olardy qaitarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratifikatsiialaý týraly» Zańǵa qol qoidy. Suraý salýlardyń oryndalý nysany men merzimderin belgileý bóliginde ózgeris engizildi. Endi sharttyń árbir eli naqty ýaqyt rejiminde Aqparattyq bazalardan málimetter almasýdy júrgizýge jáne quzyretti organdardyń suraý salýy boiynsha avtokólik urlaýǵa qarsy kúreste qyzyǵýshylyq týdyratyn aqparatty jedel usynýǵa quqyly», - dedi QR IIM resmi ókili Nurdildá Oraz onlain brifingide.
Sondai-aq, suraý salýdy oryndaý merzimi ony alǵan kúnnen bastap, bir aidan aspaityn ýaqytqa belgilendi. Qajet bolǵan jaǵdaida bul merzim qysqartylýy múmkin.
Suraý salý boiynsha aqparat berýden bas tartý úshin negizder aiqyndaldy. Suraý salý boiynsha bas tartý egemendikke, ulttyq qaýipsizdikke nuqsan keltirýi múmkin bolsa, zańdarǵa nemese halyqaralyq sharttarǵa qaishy kelse nemese suraý salý olarǵa bailanysty emes mán-jailar boiynsha obektivti túrde oryndalmaityn jaǵdailarda qaralǵan.
«Avtokólik quralyn qaitarý týraly suraý salýdy oryndaýdan bas tartý negizdemeleri tizbesi qysqartyldy. Buryn mundai negizder tórteý bolsa, endi ekeýi qaldy, atap aitqanda, suraý salynatyn taraptyń sot sheshimi boiynsha avtokólik quraly basqa adamǵa nemese onyń ókiline berilse nemese avtokólik quralyn qaitarýǵa kedergi keltiretin ózge de zańdy negizder bolsa ǵana qaralady», - dedi Nurdildá Oraz.
Onyń aitýynsha, ózgerister qosymsha aqparattyq bazalardan aqparat qalyptastyrýǵa jáne almasýǵa da septigin tigizedi. Odan bólek, talap etilmegen avtokólikti tabylǵan aýmaqtaǵy taraptyń kirisine ainaldyrý múmkindigine 1 jyl merzim belgilendi.
«Hattamada engizilgen ózgerister TMD elderinde urlanǵan avtokólikterdi qaitarý máselelerin tiimdi sheshýge múmkindik beredi», - deidi ministrlik ókili.
