QR Prezidenti Ákimshiligi basshysynyń orynbasary Timýr Súleimenov qaladaǵydai aýyldarǵa da sapaly internet jetkizý máselesin kóterdi, dep habarlaidy QazAqparat.
«Tsifrlandyrýdyń negizgi baǵyty – memlekettik qyzmetterdiń formattalýy. Bul salada qarapaiym halyq memleketpen tikelei jumys júrgizetindikten onyń mańyzyn shetke ysyra almaimyz. 2019 jyldyń sońyna deiingi josparǵa sáikes memlekettik qyzmetterdiń 80 paiyzyn elektrondy formatqa aýystyrý mindeti alǵa qoiylǵan edi. Tsifrlyq damý, innovatsiialar jáne aeroǵarysh ónerkásibi ministrligi bul mejeni oryndaǵanyn erekshe atap ótkim keledi. Bul jumys ońai bolǵan joq. Osy mindetti oryndaý jalǵyz ministrlikke bailanysty emes edi. Bul - óte jaqsy nátije», - dedi Timýr Súleimenov QR Tsifrlyq damý, innovatsiialar jáne aeroǵarysh ónerkásibi ministrliginiń keńeitilgen alqa májilisinde.
Onyń aitýynsha, biyl elektrondy formatta beriletin memlekettik qyzmetterdiń úlesin 90 paiyzǵa jetkizý kerek.
«Álbette azamattar men biznes úshin memlekettik qyzmetterdiń sapasy men jailylyǵy da esten shyǵarylmaýy tiis. Qazirgi tańda qala men aýyldy eldimekenderdi salystyrǵanda internet sapasy jaǵynan aitarlyqtai aiyrmashylyq bar. Ol jaily Úkimettiń keńeitilgen otyrysynda Memleket basshysy da atap ótti. Sol úshin el ishinde tsifrlyq teńsizdikke jol bermeýimiz kerek. Tsifrlyq damý, innovatsiialar jáne aeroǵarysh ónerkásibi ministrliginiń aldyna jyldam ári qoljetimdi internetpen qamtý jaǵynan strategiialyq turǵyda mańyzy bar mindet qoiylyp otyr», - dedi ol.
Timýr Súleimenov sonymen qatar 5G tehnologiiasyn engizýdiń de mańyzyna toqtaldy.
«Sondai-aq Úkimet innovatsiianyń damýyna erekshe mán berýde. Jahandyq báseke reitinginiń innovatsiialyq áleýet baǵyty boiynsha ókinishke qarai, keiingi úsh jylda Qazaqstan óz nátijesin 36 tarmaq boiynsha tómendetip aldy. Qazir biz 95-shi orynda turmyz. Ótken jyly Memleket basshysy innovatsiialyq saiasatqa qatysty tiisti tapsyrma bergen edi. Sol sebepti bul baǵytta Asqar Jumaǵaliev bastaǵan ministrlikke úlken úmit artylyp otyr», - dedi Timýr Súleimenov.
