QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda Qazaqstannyń 2017 jylǵy áleýmettik-ekonomikalyq damýynyń aldyn ala qorytyndylary týraly ulttyq ekonomika ministri Timýr Súleimenov baiandady, dep habarlaidy "Ult aqparat".
Qazaqstan ekonomikasynyń 2017 jylǵy basty qorytyndysy el ekonomikasynyń joǵary qarqynmen damýǵa aýysyp, qalpyna keltirý úderisterin jandandyrý boldy, dep atap ótti Timýr Súleimenov. 2017 jyldyń aldyn-ala qorytyndysyna sáikes JIÓ ósimi 4% qurady.
Ósimniń negizgi qozǵaýshy kúshteri saýda sektorlarynda óndiristi keńeitý, investitsiialyq belsendilikti arttyrý jáne ishki suranystyń birtindep qalpyna kelýi boldy. Oń syrtqy jaǵdailardyń faktorlary retinde munai men metaldarǵa joǵary baǵa koniýnktýrasyn, sondai-aq negizgi saýda seriktesteriniń — EO, Resei jáne Qytai memleketterindegi ekonomikalyq jaǵdaidyń jaqsarýyn aitýǵa bolady. 11 aidyń qorytyndysy boiynsha Reseige eksporttaý 33% -ǵa ósti, EO-ǵa – 31%, Qytaiǵa - 34,9% ósti.
Óndirýshi salalardyń qarqyndy ósýine qaramastan, JIÓ-niń ósý kózderi ekonomikanyń shikizattyq emes segmentinde shoǵyrlanǵan. Osylaisha, JIÓ-niń 4% ósiminde shikizattyq emes sektordyń úlesi 60%-dy qurady. Tutastai alǵanda, naqty sektorda ekonomikanyń barlyq salalarynda óndiristiń sinhrondyq ósimi belgilengen.
Eń joǵarǵy ósim ónerkásipte 7,1% deńgeiinde, kólik salasynda – 4,8%, bailanys – 3,3% jáne saýdada – 3,2% baiqaldy. Munai óndirý kóleminiń ósýi esebinen taý-ken ónerkásibinde ozyq kórsetkishter belgilendi.
Óńdeý ónerkásibi 5,1 paiyzdyq ósim deńgeiin kórsetedi, bul negizinen Indýstriialandyrý kartasyndaǵy jobalardy iske asyrý arqyly júzege asyrylýda.
2017 jyldyń qańtar-qarasha ailarynda IIDMB arqyly 850 mlrd teńgege 62 joba engizildi jáne 5,5 myń jumys orny ashyldy.
Ministr farmatsevtika salasynyń qarqyndy damyp kele jatqanyn atap ótti, onyń ónimi 41,8%-ǵa ósti. Jeńil ónerkásip 9 investitsiialyq jobany iske qosýǵa jáne júie qurýshy kompaniialardyń qazaqstandyq qamtýynyń ulǵaiýyna bailanysty óndiristi 7,3%-ǵa arttyrdy.
Suranystyń ósýi tiisinshe 7,2%, 5,9%, 5,1% jáne 4,1% deńgeiindegi ósim baiqalǵan himiia, metallýrgiia, munai óńdeý jáne tamaq ónerkásibine qosymsha serpin berdi.
Budan ózge, mashina jasaý salasynda 5,6% deńgeiinde turaqty ósim belgilengen. Aýyl sharýashylyǵynda ósim 2,9%-dy qurady: ósimdik sharýashylyǵynyń ónimi 2,2%-ǵa, mal sharýashylyǵy ónimi 3,9%-ǵa ósti.
«Ekspo-2017» kórmesin ótkizý ishki naryqta suranysty arttyryp, bólshek saýda segmentterinde, meiramhana, qonaq úi biznesi jáne búkil qyzmet kórsetý salalarynda ShOB múmkindikterin keńeite otyryp, elimizge kóptegen týristerdi tartty.
2017 jyly negizgi kapitalǵa salynǵan investitsiialar kólemi 5,5%-ǵa artty. 2017 jyldyń 11 aiynda investitsiialardyń negizgi ósimi aýyl sharýashylyǵyna baǵyttaldy, onda ósim 29,3%-dy qurady, saýda – 21,8%, qurylys – 11,8%, bailanys – 9,5% jáne ónerkásip – 3,8% boldy.
2017 jyldyń 9 aiynda Qazaqstan $15,7 mlrd astam tikelei sheteldik investitsiialardy tartty, bul 2016 jyldyń osy kezeńimen salystyrǵanda 5,3%-ǵa joǵary kórsetkish.
Jalpy alǵanda, eldiń syrtqy saýda ainalymy 25,1%-ǵa artyp, $69,5 mlrd-qa jetti.
«Ekonomikanyń turaqty ósimi áleýmettik kórsetkishterdiń jaqsarýymen qatar júrdi. Máselen, esepti kezeńniń 9 aiy ishinde jaldamaly jumysshylar sany 53,1 myń adamǵa artyp, 1 qazandaǵy jaǵdai boiynsha 6,4 mln adamdy qurady. Bul jumyssyzdyqty tómengi 5,0% deńgeiinde ustaýǵa múmkindik berdi», — dep qorytyndylady T. Súleimenov.
Ulttyq Banktiń basqarma tóraǵasy Daniiar Aqyshev bank salasyndaǵy jyldyń aldyn ala qorytyndysyn jariialady.
2017 jylǵa arnalǵan respýblikalyq biýdjet oryndalýynyń aldyn-ala qorytyndylary týraly qarjy ministri B. Sultanov baiandady.
QR Premer-Ministri Baqytjan Saǵyntaev qorytyndylai kele, aldyn-ala málimetterge sáikes, 2017 jyly Memleket basshysynyń eldiń ekonomikalyq ósimin 4% qamtamasyz etý jónindegi tapsyrmasy oryndalǵanyn atap ótti. Salalyq ministrlikter men óńirler óz kórsetkishteri boiynsha ekonomikalyq ósimdi qamtamasyz etti. Bundai kórsetkishterge Úkimettiń jáne ákimdikterdiń uiymdastyp atqarǵan jumystarynyń nátijesinde qol jetkizildi.
