Vaktsina pasportyn qoldan jasaý da, ony satyp alý da azamzatqa qarsy qylmys jasaýmen teń. Nur-Sultan qalasy Qoǵamdyq densaýlyq saqtaý basqarmasynyń basshysy Timýr Muratov ákimdiktiń onlain brifinginde osyndai pikir bildirdi, dep habarlaidy QazAqparat.
«Vaktsina pasportyn qoldan jasaýshylardyń jolyn kesý úshin tiisti sharalar qabyldanyp jatyr. Mundai mańyzdy qujatty qoldan jasap satý degen endi óte qiyn jaǵdai. Ony alǵan halyqtyń da, jasap júrgen azamattardyń da istep júrgen qylmysy – adamzatqa qarsy qylmys. Óitkeni qoldan jasalǵan pasport alǵan adam – ózine reanimatsiiaǵa bilet satyp alǵan adam. Sondyqtan, buǵan qarsy turý úshin quqyq qorǵaý organdary jumys istep jatyr. Birshama tergeý jumystaryn júrgizip, keibir máselelerdi anyqtaýda», - dedi basqarma basshysy.
Onyń aitýynsha, elordadaǵy infektsiialyq statsionarlar 72 paiyzǵa tolǵan. Osyǵan bailanysty qalalyq aýrýhanalar infektsiialyq rejimge aýystyrylyp jatyr.
«Aýrýdyń ósýine bailanysty qalalyq aýrýhanalardy infektsiialyq retinde qaita beiimdeýge jáne ázirge kúndizgi statsionardyń jumysyn, josparly emdeýge jatqyzýdy toqtatýǵa týra keledi», - dedi Timýr Muratov.
