«Atameken» UQP Tóralqa Tóraǵasy Timýr Qulybaev pen Basqarma Tóraǵasy Abylai Myrzahmetov bastaǵan delegatsiia Qyzylorda oblysyna jumys saparmen keldi.
«Prima Park» biznes-ortalyǵynda Ulttyq kásipkerler palatasy, Qyzylorda oblysynyń ákimi jáne jergilikti biznes-qaýymdastyǵynyń qatysýymen Óńirlik kásipkerler keńesiniń keńeitilgen májilisi ótti.
«Atameken» UKP Tóralqa Tóraǵasy Timýr Qulybaev aimaqta júrgizilip jatqan shaǵyn jáne orta biznesti damytý boiynsha aýqymdy jumysty atap ótti.
«Syr óńirinde oblys ákimdigi jáne ákimi tarapynan atqarylǵan úlken jumysty atap ótkim keledi. Búgin Elbasy da «Nur Otan» partiiasynyń Saiasi Keńesiniń otyrysynda Qyzylorda oblysynyń birqatar sala boiynsha, onyń ishinde, jer máselelerin elektrondyq formatqa kóshirip, kásipkerlerge qyzmet kórsetý jáne kásipkerlerdi qoldaý ortalyqtaryn ashý jáne t.b. mańyzdy isterde jetken jetistikterine toqtalyp ótti. Búkil respýblika boiynsha eńgizýge turarlyq ozyq tájiribelerińiz úshin Ózińizge jáne komandańyzǵa alǵysymdy bildiremin», - dedi Timýr Qulybaev.
Óz kezeginde, oblys ákimi aimaqta jappai kásipkerdikti damytý boiynsha júrgizilip jatqan jumystar týraly baiandap, kásipkerler Palatasynyń basshylyǵyna jergilikti bilik bastamalaryn qoldaý úshin rizashylyǵyn bildirdi.
«Biz 2018 jyldy Jappai kásipkerlikti qoldaý jyly dep jariialap, tiisti Jol kartasy ázirledik jáne barlyq qarjylandyrý kózderinen 32 mlrd. teńge jinaqtap, onyń 3 mlrd. teńgege jýyǵyn startap-jobalaryna qarastyrdyq. Memlekettik baǵdarlama aiasynda qarjy bólinýin kútpei-aq, oblystyq biýdjetten 1 mlrd. teńge bólip, Óńirlik investitsiialyq ortalyqqa ornalastyrdyq, óitkeni onda ekinshi deńgeili banktarǵa qaraǵanda paiyzdyq mólsherleme qoljetimdi, kepil múlik jáne nesie berý saiasaty yńǵaily ári aqsha qaitarymdylyǵy joǵary. Odan bólek, mikrobizneske qaitarymsyz grant berý maqsatynda 200 mln.teńge bólinedi. Qazirdiń ózinde 800 jýyq ótinim túsip, komissiia qaraýynda. Komissiianyń quramynda Óńirlik kásipkerler palatasynyń 4 ókili bar, sondyqtan sheshim ádiletti qabyldanatyn bolady dep oilaimyn», - dedi oblys ákimi.
Sondai-aq, keńes otyrysynda «Atameken» UKP Basqarma tóraǵasy Abylai Myrzahmetov pen óńirlik kásipkerder palatasynyń direktory Ǵalymbek Jaqsylyqov baiandama jasady jáne biznesti qoldaýdyń ózekti máseleleri men damytý perspektivalary talqylandy.
«Atameken» UQP basshysy jergilikti investordyń qarajaty esebinen salynǵan «Prima Park» biznes-ortalyǵynyń jumysymen tanysty. 8 qabatty biznes-ortalyqtyń ǵimaratynda 32 bólmeli qonaq úi jáne arendalyq bólmeler ornalasqan. Ǵimarat ishinde kovorking ortalyǵy men «open-space» túrindegi 80 jáne 30 oryndyq eki konferents-zal qarastyrylǵan. Keshen jyldamdyǵy joǵary internet pen aǵylshyn jáne qytai tilderine ilespe aýdarma júiesimen qamtylǵan.
Sapar barysynda delegatsiia músheleri Qyzylorda qalasynyń sol jaǵalaýynda salynyp jatqan «Smart City Qyzylorda» nysandarymen tanysty. Jańa qalada 1925 jyly ultqa «qazaq» ataýyn qaita berý týraly tarihi sheshim qabyldanǵan Qazaq Ortalyq atqarý komitetiniń burynǵy ǵimaraty arhivtegi syzbalar boiynsha qaita salynǵan Rýhani jańǵyrý ortalyǵy salyndy. Qazirgi tańda munda 18 kópqabatty turǵyn úi salynyp, qala kúnine orai paidalanýǵa berilmek. Sondai-aq, munda 320 oryndyq balabaqsha, «Bolashaq» ýniversitetiniń stýdentter qalashyǵy, jastar resýrstyq ortalyǵy, emhana, Neke qiiý saraiy men ózge de áleýmettik nysandardyń qurylysy salynýda.
Aita keteiik, 2018 j. 1 sáýirdegi jaǵdai boiynsha oblysta 50 738 kásipkerlik sýbektileri tirkelgen, onyń ishinde jumys isteitin 38758, iaǵni ótken jylǵy tiisti kezeńimen salystyrǵanda 10 paiyzǵa artyq. Bul respýblika boiynsha úzdik kórsetkish. Onyń ishinde 4993– zańdy tulǵalar, 28551 jeke kásipker jáne 5214 – sharýa qojalyqtary. Shaǵyn jáne orta biznes kásiporyndarynda jumyspen qamtylǵandar sany 2018 j. 1 qańtarynda 84 520 adamdy qurady. 2017 jyly shaǵyn jáne orta biznes sýbektileri jalpy quny 302,186 mlrd.teńgege qnim óndirdi. 2018 j. qańtar-sáýir ailarynda aimaqta 2476 JK, 78 sharýa qojalyq pen 240 JShS quryldy.
Sondai-aq, «Bastaý-Biznes» baǵdarlamasy boiynsha 1600 adamdy oqytý josparlansa, sáýir aiynda alǵashqy 327 adam oqýyn bastady. 800 jýyq adam «Biznes-Keńesshi» baǵdarlamasy boiynsha oqý kýrsynda bilim alatyn bolady, búgingi kúni 333 adam oqýǵa kiristi.
