Bul týraly Májilis depýtaty Bekbolat Tileýhan Nur-Sultan qalasynda ótken «Nur Otan» partiiasynyń "Biz birgemiz!" beibit mitinginde aitty, dep habarlaidy "Ult aqparat".
Aldymen Táýelsizdiktiń qadirin, Elbasynyń eren eńbegin aitqan depýtat Ábilázovtiń óziniń qylmysker ekenin moiyndaǵanyna nazar aýdardy.
«Ábilázov Parijde túrmeden shyǵa salyp moiyndady. Ony sottaǵan Qazaqstan emes, Eýropa. Al ony sotqa bergen Ýkraina men Resei. Grýziia da oǵan bergen ataǵyn «ondai alaiaqqa beretin ataǵymyz joq», dep qaitaryp aldy. Sol alaiaq «aqshasyn tólep, qyrǵyz revoliýtsiiasyn qoldan jasaǵan menmin. Ony Qazaqstanǵa áser etý úshin ádeii istedim», dedi. Sol tóńkeristen qanshama adam bosyp ketti, qanshama qan tógildi, qanshama otbasy zarlap qaldy? Sonda da osynshama qandy moinyna júktep jatqanyna shimirikpei, «osyndai revoliýtsiiany men jasattym», degen adamnyń sózine ilanyp, senýge bolmaidy», – dedi B.Tileýhan.
Sondai-aq ol revoliýtsiiamen armanyna jetken el joq ekenin tilge tiek etip, halyqty Qazaqstannan urlaǵan aqshasyn Qazaqstannyń qasiretine jumsap jatqan adamnyń sózine ermeýge shaqyrdy.
Mitingide sóz alǵan taǵy bir Májilis depýtaty Baqytgúl Hamenova Elbasynyń salyp beregen syndarly jolyn kim-kóringenniń kózine tárk etpeý kerektigin aityp, jastar tárbiesin kúsheitý qajettigin sóz etti.
«Jastarymyzdy erteń aitaqqa ermei, eshkimniń qoljaýlyǵy bolmaityndai etip tárbieleý ár otbasyǵa syn. Men anamyn! Anaǵa eń birinshi ne kerek? Birinshi, turaqtylyq kerek. Balalarymyz alańsyz ómir súretindei tynyshtyq kerek. Sondyqtan da tynyshtyǵymyz ben turaqtylyǵymyz úshin barlyǵymyzdyń da er qaiysatyn júkti kóteretin sátimiz keldi. Bizder birin biri kóre almaityn emes, birin biri kórmese tura almaityn qazaq bolýymyz kerek, aǵaiyn!», – depýtat hanym.
Aita keteiik, búgin Nur-Sultan qalasynda eldiń arasyna iritki salyp júrgen arandatýshylardyń qiturqy áreketterine qarsy halyq beibit sherýge shyqty. Qaladaǵy «Jeruiyq» saiabaǵyna jinalǵan 1500-den astam azamat táýelsizdigimizdiń tamyryna balta shabatyn jalǵan urandarymen eldiń irgesine syzat túsirýdi kózdeitin aram piǵyldy Ábilázov siiaqty keritartpalardyń áreketterine qarsy óz oilary men pikirlerin ashyq aitty.
