Belarýstegi prezident sailaýynda Aleksandr Lýkashenkonyń basty qarsylasy bolǵan Svetlana Tihanovskaia azamattarǵa taǵy málimdeme jasady, dep habarlaidy Azattyq.
"Eldegi ahýal tynyshtalyp, qalypty tirlikke kóshý úshin jáne barlyq saiasi tutqyndardy bosatyp, tez arada zańnamalyq negiz ben jańadan prezident sailaýyn ótkizý sharttaryn ázirleý úshin ult kóshbasshysy retinde shyǵyp, jaýapkershilikti alýǵa daiynmyn" dedi Tihanovskaia videomálimdemede.
Ol málimdemede saiasatker bolǵysy kelmegenin, biraq taǵdyrdyń "ádiletsizdik pen bassyzdyqqa qarsy turatyn maidannyń aldyńǵy shebinde" bolýdy jazǵanyn aitty.
"Sizder maǵan daýys berdińizder jáne ne úshin daýys bergenderińizdi de anyq túsinemin. Biz 26 jyl burynǵy qaitalap kele beretin sheńberden shyqqymyz keledi" dedi Svetlana Tihanovskaia.
Birneshe kún buryn Tihanovskaianyń Litvaǵa ketkeni belgili bolǵan edi. Onyń jaqtastary Tihanovskaia qysymmen elden ketýge májbúr boldy dep málimdedi. Izinshe onyń narazylyqqa shyqpaý týraly videoúndeýi jariialandy. Videoda Tihanovskaianyń sózin qaǵazǵa qarap turyp aityp otyrǵany baiqalady. Jaqtastary oǵan qoqan-loqy jasap, málimdemeni oqytýǵa májbúr qyldy dep topshylaǵan. Tihanovskaia málimdemede Lýkashenko jeńisin moiyndaitynyn nemese sailaýdyń resmi qorytyndysyn daýlaýdan bas tartatyny týraly aitpaǵan. Onyń qaida túsirilgeni de belgisiz.
Tihanovskaia 15 tamyzda taǵy da videomálimdeme jasap, belarýs qalalaryn 15-16 tamyzda beibit sherýge shyǵýǵa shaqyrǵan.
Ótken senbi-jeksenbi kúnderi Belarýste iri narazylyq ótip, jinalǵandar prezident Aleksandr Lýkashenkonyń otstavkaǵa ketýin talap etti. Olar sonymen birge ádil sailaý ótkizýdi, kúshtik qurylymdardyń demonstranttarǵa kúsh qoldanbaýyn jáne saiasi tutqyndar men ustalǵandardy bosatýdy talap etti.
Jeksenbi kúni Minskide bolǵan narazylyq sherýine 100 myńnan asa adam qatysqan. Oǵan Brest, Mogilev, Grodno, Vitebsk, Bobrýisk jáne ózge qalalardan kelgen.
Tihanovskaia – tanymal bloger Sergei Tihanovskiidiń áieli. OSK kúieýin kandidat retinde tirkeýden bas tartqannan keiin sailaýǵa onyń ornyna áieli qatysqan. Sergei Tihanovskii qazir qamaýda otyr. Ózge opponentterdi tirkeýden bas tartqannan keiin Tihanovskaia Lýkashenkonyń sailaýdaǵy basty qarsylasyna ainalǵan.
Tihanovskaia jaqtastary sailaý qorytyndysy burmalandy dep esepteidi. Olar dálel retinde oppozitsiia kandidatyna sailaýshylardyń 60-70 paiyz daýys bergenin dáleldeitin hattamalardy alǵa tartady.
Belarýste prezident sailaýy 9 tamyzda ótken, onyń resmi qorytyndysy boiynsha, Lýkashenko sailaýshylardyń shamamen 80 paiyz daýysyn alyp jeńgen. Budan soń elde sailaý qorytyndysyna narazylyq órshigen. Bilik narazylardy kúshpen basty. Júzdegen adam jaraqattandy, keminde bir adam qaza boldy.
