Jumys keńseden úige aýysqan kezde, jaǵdai da ózgeredi. Mundai kezde jumys ónimdiligi men densaýlyqty saqtap qalý úshin ne isteý kerek? Osyndai suraqtarǵa qatysty tájiribeli frilanser óz keńesin aitty, dep habarlaidy The Wall Street Journal.
Avtordyń aitýynsha, koroanvirýs pandemiiasy kezinde kóptegen adam úiden jumys isteý máselesimen alǵash ret betpe-bet jolyqty. Maqala avtory óziniń 22 jyl úide jumys istegenin jáne sońǵy tór jylda kúieýiniń de qashyqtan jumys isteýge kóshkenin aita kele, oqyrmandarmen óz tájiribesimen bólisedi.
«Birinshiden, úiden jumys istegen kezde 8 saǵattyq jumys kúnin umytyńyz. Keńsedegi jumysta bul saǵattardyń kóbi jinalysqa, áriptestermen áńgimelesýge, kezdeisoq úziliskke ketedi. Iaǵni, keńsedegi 8 saǵatta atqarlatyn jumysty úide bes saǵatta aiaqtaýǵa bolady. Ekinshiden, kúnine úsh mindet qana josparlaý qajet. Bul ásirese jumys kestesin qajet etpeitin mamandyq ieleri úshin jaqsy. Iaǵni, bir kúnge josparlanǵan birneshe jumys aiaqtalǵanda jumys ta bitti degen sóz», - dep jazady avtor.
Maqalada avtor ýaqyt basqarýdyń jańa formatyna kóshýdi usynady. Mysaly, Timing.app nemese ManicTime sekildi kompiýterge arnalǵan baǵdarlamalardy paidalanýǵa bolady. Bul qosymsha jumys ýaqytyn eseptep otyrady.
«Tabiǵi energetikalyq tsikldy saqtańyz. Túni boiy jumys istep, erteńinde sharshap júrý eshkimge de qajet emes. Sonymen qatar áriptestermen qarym-qatynasty saqtap qalý da mańyzdy. Sol sebepti olarmen jumys barysyn talqylaǵannan keiin 5-10 minýt áńgimelesýge de bolady. Taǵy bir aita keterligi, úide jumys istegende fizikalyq belsendilik tómendeidi. Sol sebepti qadam ólsheitin baǵdarlamalardy qoldanyp, kóp qimyldaýǵa tyrysý kerek», - dep jazady avtor.
