Terrorizmnen zardap shekken balalardyń quqyqtaryn qorǵaý boiynsha Qazaqstan saiasaty BUU kongresinde talqylandy, dep habarlaidy "Ult aqparat".
Birikken Ulttar Uiymynyń Qylmystyń aldyn alý jáne qylmystyq sot tóreligi jónindegi 14-shi Kongresi (Kioto, Japoniia) aiasynda BUU Esirtki jáne qylmys basqarmasynyń (EQB) uiymdastyrýymen terrorizm jáne ekstremizmnen zardap shekken balalardyń ahýaly taqyrybynda arnaiy is-shara ótti.
Bul sessiiaǵa Qazaqstan Syrtqy ister ministrliginiń Erekshe tapsyrmalar jónindegi elshisi Talǵat Qaliev qatysty.
T.Qaliev elimizdiń «Jýsan» jáne «Rýsafa» gýmanitarlyq operatsiialary sheńberinde balalardy Siriia jáne Iraktan elge qaitarý tájiribesin baiandap berdi.
Kezekti operatsiianyń qorytyndysy boiynsha biylǵy aqpan aiynyń basynda taǵy 7 bala Otanǵa oralǵany belgili.
«Qazirgi tańda elimizdiń memlekettik organdary árbir bala úshin jeke-jeke ázirlengen psihologiialyq jáne bilim alý baǵdarlamalary sheńberinde keshendi kómek kórsetýdi jalǵastyryp otyr», - dep málimdedi ol.
Osyǵan orai BUU EQB jáne basqa halyqaralyq seriktesterimizge qazaqstandyq balalardy ońaltý jáne qaita beiimdeý salasynda kórsetip otyrǵan járdemi úshin rizashylyq, sondai-aq odan ári bul saladaǵy tájiribemen almasýǵa daiyndyq bildirildi.
«BUU EQB ókilderi Qazaqstan Taiaý Shyǵystaǵy áskeri qaqtyǵys aimaqtarynda qalyp qalǵan balalardy qaitarý jáne reintegratsiialaý isinde álemdegi kóshbasshylardyń qatarynda ekenin atap ótti.
Sonymen qatar, is-shara barysynda kámeletke tolmaǵandardy terroristik jáne ekstermistik is-áreketke tartýdyń aldyn alý jáne oǵan qarsy turýǵa baǵyttalǵan Eýropalyq odaq, Japoniia, Indoneziia, Irak jáne Nigeriianyń bastamalary talqylandy», - dep málim etti QR Syrtqy ister ministrliginen.
