Elimizde tergeý izoliatorlaryndaǵy baqylaý eki ese kúsheitildi. Bul týraly QR Qylmystyq-atqarý júiesi komiteti tóraǵasynyń orynbasary Meiram Aiýbaev aitty, dep habarlaidy QazAqparat tilshisi.
«Basym mindetterimizdiń biri – ol quqyqqa qarsy is-áreketterdiń kez kelgen túrin joiý. Zańnamada bundai áreketterge qylmystyq jaýaptylyq kózdelgen. Qazaqstan buzýshylyqtardyń, onyń ishinde qatygez, ar-namysty qorlaityn jáne ómir men densaýlyqqa qaýipti áreketterdiń aldyn alý boiynsha halyqaralyq mindettemelerdi aldy. Qazaqstan zańnamasy «Nelson Mandela erejeleri» dep atalatyn tutqyndarǵa qatysty minimaldy standartty erejelerge sáikes keledi. «Qańtardaǵy oqiǵalarǵa» bailanysty qamaýǵa alynǵan azamattardyń ustaý jaǵdailaryna qoǵamnyń nazary erekshe aýǵan kezde biz tergeý izoliatorlaryndaǵy baqylaýdy eki ese kúsheittik. Qoǵamdyq monitoring júrgizýge tolyq múmkindik berdik», - dedi tóraǵa orynbasary Ishki ister ministrliginiń baspasóz qyzmeti alańynda ótken brifingide.
Onyń atap ótýinshe, QAJ komitetine qarasty mekemeler jabyq sanalady. Sondyqtan bul jaita qylmystyq-atqarý júiesine degen senbeýshilikti týdyrýy múmkin. Osyǵan orai komitet ashyqtyqty qamtamasyz etý maqsatynda qoǵamdyq-baqylaý komissiialarmen, úkimettik emes uiymdarmen birge jumys istep jatyr. Olar qamaýdaǵy azamattardyń quqyqtary men ustaý jaǵdailaryna táýelsiz monitoring ótkizedi.
«Máselen, olar 13 tergeý izoliatorynda 60-tan astam ret boldy. Mekemelerdegi barlyq turǵyn, qyzmettik, kommýnaldyq-turmystyq bólmelerdi qoǵam músheleriniń komissiiasy tekseredi. Tergeý izoliatorlaryna túsken barlyq adamdar mindetti túrde meditsinalyq tekserýden ótedi», - dedi ol.
Onyń dereginshe, Adam quqyqtary jónindegi ýákil Elvira Ázimova, «Adam quqyqtary úshin hartiia» qoǵamdyq qorynyń basshysy Jemis Turmaǵambetova bastaǵan komissiia qoǵam múshelerimen jáne advokattarmen birge tergeý izoliatorlarynda ustaý jaǵdailaryn tekserdi. Olar 6 óńirde tergeýge qamalǵan 100-den astam adamdy qabyldady.
«Sondai-aq, ustaý jaǵdailaryn Májilis, máslihat depýtattary men jergilikti atqarýshy organdar tekserdi. Osy kezdesýlerdiń nátijesinde mekeme ákimshiligine shaǵymdar túsken joq», - dedi Meiram Aiýbaev.
