kollaj: Tengrinews.kz
Grýziiada jumbaq jaǵdaida qaitys bolǵan qazaqstandyq Ásel Aitbaevanyń anasy Aisulý Aitbaeva qazaqstandyq tergeýshilerge shaǵymdandy, - dep habarlaidy Tengrinews.kz tilshisi.
Áieldiń aitýynsha, qyzynyń qaitys bolǵanyna jaqynda týra bir jyl ótedi. Degenmen, politseiler ólimge qatysty sotaldy tergeý amaldaryn áli júrgizip jatyr.
"Grýziialyq tergeýshige telefon soqqanymda, ol óz jumysyn oryndaǵanyn aitty, endigi sheshimdi Qazaqstan politsiiasy shyǵarady. Biraq bul jerde, Qazaqstanda tergeý áli aiaqtalmaǵan, materialdar áli sotqa berilgen joq. Al mamyrda qyzym Áseldiń qaitys bolǵanyna bir jyl bolady. Olar tergeýdi áli sozyp júr. Kisi óltirdi degen kúdikti Murat Meiirbekovke qatysty saraptama daiyn emes. Onyń ózi Qazaqstanda, men qandai saraptamalar júrgizilip jatqanyn bilmeimin, ispen tanys emespin", - dedi Aisulý Aitbaeva.
Ol Bas prokýratýra men Syrtqy ister ministrligine aryzdanǵanyn aitty. Degenmen, osy ýaqytqa deiin áiel eshqandai naqty aqparat almaǵan.
"Bas prokýratýrada Grýziiadan keletin barlyq qujatty kútip otyrǵanyn aitty. Bir jarym jyldan soń, olar dálel men aiǵaq joq dep, Meiirbekovti bosatyp jibere me dep qorqamyn. Tergeýshi adam saýdasy týraly isti tergep jatqanyn aitady. Biraq munyń ne qajeti bar, eger bala qaitys bolǵany fakt bolsa. Men balam úshin kóbirek alańdaimyn, al olar neni dáleldegeli jatqany ekinshi másele.
Sondyqtan osyndai jaǵdaida men Qazaqstan Prezidentine hat jazdym. Sońyna deiin baramyn, qajet bolsa BUU-ǵa júginemin. Qyzym Ásel kináliniń jazasyn alǵanyn qalaidy. Men bul máselege núkte qoiylǵanyn qalaimyn. Muny men ǵana emes, Meiirbekov te kútip otyr, sony bilemin. Onyń ata-anasy da alańdaýly. Sondyqtan sottyń ashyq ótýin talap etemin. Biraq, nege ekeni belgisiz, muny eshkim qalamaidy. Degenmen, men ádildikti qalaimyn", - dep túiindedi ol.
Ishki ister ministrliginiń baspasóz qyzmeti Murat Meiirbekovke qatysty sotaldy tergeý júrip jatqanyn habarlady. Onyń áreketi Qylmystyq kodekstiń 128 jáne 120-baptary boiynsha "Adam saýdasy" jáne "Zorlaý" boiynsha saraptalǵan.
"Qylmystyq isti Nur-Sultan qalalyq PD tergep jatyr. Tergeý jalǵasyp jatyr, onyń merzimi qylmystyq-protsessýaldyq zańnama normalaryna sáikes uzartyldy. Qylmystyq is júrgizý kodeksiniń 201-babyna sáikes, basqa da derekter jariia etýge jatpaidy. Olar prokýrordyń ruqsatymen ǵana jariia etilýi múmkin", - dedi IIM ókilderi.
Qazaqstandyq Ásel Aitbaeva byltyr 5 mamyrda Grýziiada turǵyn úi aýlasynan óli tabylǵan bolatyn. Tergeýshiler anyqtaǵandai, ol ólim aldynda zorlanǵan. Óler aldynda Ásem qurbysyna bir saǵattyq aýdiojazbasyn jibergen. Grýziianyń Bas prokýratýrasy Áseldiń alys týysy Murat Meiirbekovke syrttai aiyp taqqan bolatyn.
