Foto ©️ Tengrinews.kz / Turar Qazanǵapov
Burynǵy Ulttyq ekonomika ministri Qýandyq Bishimbaevtyń áieliniń ólimine qatysty is tergeýge alyndy, dep habarlaidy "Ult aqparat" Astana qalasy politsiia departamentiniń baspasóz qyzmetine silteme jasap.
"Elordalyq politsiia departamenti Astanadaǵy meiramhanalardyń birindegi áieldiń ólimine qatysty QR Qylmystyq kodeksiniń 99-baby 1-bóligi boiynsha tiisti tergeý jumystaryn júrgizip jatyr" - delingen habarlamada.
Qylmystyq kodekstiń bul baby "Adam óltirý, iaǵni basqa adamdy quqyqqa qarsy qasaqana qazaǵa ushyratý" dep atalady. Ol boiynsha 8 jyldan 15 jylǵa deiingi merzimge bas bostandyǵynan aiyrý jazasy kózdelgen.
Keshe, 9 qarashada birqatar BAQ Astanadaǵy meiramhanalardyń birinde eks-ministr Qýandyq Bishimbaevtyń áieli kóz jumǵanyn habarlady. Astana politsiiasy marqum soqqyǵa jyǵylǵanyn jáne alǵan jaraqatynan qaza bolǵanyn málimdedi. Tártip saqshylary kúdiktini sol kúni ustaǵan, biraq onyń aty-jóni atalmady.
Búgin, 10 qarashada Ishki ister ministriniń orynbasary Sáken Sársenov osy fakti boiynsha burynǵy Ulttyq ekonomika ministri Qýandyq Bishimbaevtyń ustalǵanyn rastady.
Esterińizge sala keteiik, Qýandyq Bishimbaev 2018 jyly jemqorlyq qylmysy úshin 10 jylǵa sottalǵan bolatyn. Alaida bir jyldan keiin túrmeden shyqty.
Eldi dúrliktirgen qaiǵyly oqiǵadan keiin 10 qarashada Shymkent soty Bishimbaevtyń nege tym tez bostandyqqa shyqqanyn túsindirdi. Olardyń aqparatynsha, 2019 jyly Bishimbaev Prezident Jarlyǵymen keshirilip, jaza merzimi 4 jylǵa deiin qysqartylǵan. Budan soń eks-ministr shartty túrde merziminen buryn bosatý týraly ótinish jazǵan. Sot bul ótinishti qanaǵattandyrdy.
Bishimbaev 2019 jyly 11 qazanda bostandyqqa shyqty. Jaza merzimi 2021 jyly 9 qańtarda aiaqtalǵan.
