Qazaqstannyń birinshi, álemniń 17-raketkasy Elena Rybakina Rim WTA 1000 týrniriniń úshinshi ainalymyna shyqty, dep habarlaidy QazAqparat.
Qazaqstandyq tennisshi ekinshi kezdesýin dúniejúzilik reitingte 102-orynda turǵan amerikalyq Loren Devispen ótkizdi.
Bul olardyń sporttyq jolyndaǵy ózara birinshi básekesi edi.
Birinshi partiiada Rybakina 4:1 esebimen alǵa ketkenimen, qarsylasy tarazy basyn teńestirdi – 4:4. Degenmen Elena taǵy bir breik jasap, setke dop bergende, óz múmkindigin múlt jibergen joq – 6:4.
Ekinshi sette qazaqstandyq tennisshi 3:0 esebimen alǵa ketti. Sodan keiin osy basymdylyǵynan aiyrylǵan joq – 6:3.
Saǵat jarymnan astam ýaqytqa sozylǵan match barysynda Rybakina 6 eis jasap, 4 breik-pointty túgel paidalandy. Qarsylasy 2 breikten (8 breik-point) asa alǵan joq.
Rybakina júlde qory 2,5 mln eýrodan asatyn dodanyń shirek finalyna shyǵý úshin álemniń 6-raketkasy, chehiialyq Karolina Plishkova nemese reitingte 29-satydaǵy shveitsariialyq Hil Belen Taihmannyń bireýimen talasady.
Búgin sondai-aq, Iýliia Pýtintseva Rimde álemniń 10-raketkasy, ispaniialyq Garbine Mýgýrýsamen oinaidy.
