Álemniń 112-raketkasy Zarina Diias Chikago WTA 125 týrniriniń shirek finalyna shyqty, dep habarlaidy "Ult aqparat".
Qazaqstandyq tennisshi ekinshi ainalymda reitingte 114-orynda turǵan italiialyq Sara Erranimen kezdesti.
Birinshi partiiada Zarina 6:3 esebimen basym tústi. Ekinshi sette 34 jastaǵy tájiribeli tennisshi ese qaiyrdy – 6:1.
Úshinshi, sheshýshi partiiada Diias 3:1 esebimen alǵa shyqqanymen, qarsylasy tarazy basyn teńestirdi. Degenmen Zarina taǵy bir breikke qol jetkizip, matchty jeńispen túiindedi – 6:4.
2 saǵat 20 minýtqa sozylǵan tartysty básekede qazaqstandyq sportshy 3 breik jasap, 12 breik-pointtyń teń jartysyn múlt jibergen joq. Errani 1 eis jasap, 16 breik-pointtyń altaýyn paidalandy.
Diias jartylai finalǵa shyǵý úshin álemniń 66-ynshy, osy jarystyń 3-raketkasy, amerikalyq Enn Limen talasady. Ol ekinshi ainalymda reitingte 102-satydaǵy frantsiialyq Osean Dodendi qinalmai utty – 6:3, 6:1.
