Qazaqstannyń birinshi, álemniń 32-raketkasy Iýliia Pýtintseva Brisben (Aýstraliia) WTA týrnirinde sátti óner kórsetýde, dep habarlaidy "Ult aqparat".
Negizgi týrnirge irikteý saiystarynan keiin qosylǵan qazaqstandyq sportshy alǵashqy ainalymda álemniń 20-raketkasy, horvatiialyq Donna Vekichpen kezdesti.
Birinshi partiiada Iu.Pýtintseva 6:3 esebimen basym tússe, ekinshisinde D.Vekich dál sondai eseppen qarymta qaiyrdy.
Úshinshi, sheshýshi sette qazaqstandyq tennisshi matchty jeńispen támamdai aldy – 7:5.
Asa tartysty báseke 2 saǵat 33 minýtqa sozyldy.
Iu.Pýtintseva Brisben týrniriniń (júlde qory – 1,5 mln AQSh dollary) ekinshi ainalymynda álemniń 27-raketkasy, amerikalyq Daniel Kollinzben sheberlik baiqasady. Ol birinshi ainalymda álemniń 5-raketkasy, ýkrainalyq Elina Svitolinany qapy qaldyrdy.
Eske sala keteiik, budan buryn Aleksandr Býbliktiń qazaqstandyq tennisshilerdiń jeńisti jolyn jalǵastyrǵanyn, Zarina Diiastyń Qytaidaǵy týrnirdi sátti bastaǵanyn jazǵan bolatynbyz.
