Qazaqstandyq tennisshiler Iýliia Pýtintseva men Aleksandr Býblik US Open týrniriniń úshinshi ainalymyna shyqty, dep habarlaidy "Ult aqparat".
Dúniejúzilik reitingte 39-orynda turǵan Iu.Pýtintseva ekinshi ainalymda Belarýs eliniń ókili, álemniń 13-inshi, osy dodanyń 9-raketkasy Arina Sobolenkomen kezdesti.
Qazaqstandyq tennisshi 6:3, 7:6 (7:3) esebimen jeńiske jetti.
Báseke 1 saǵat 54minýtqa sozyldy.
Iu.Pýtintseva úshinshi ainalymda álemniń 23-raketkasy, horvatiialyq Donna Vekichpen kúsh synasady.
Reitingte 75-satyda turǵan A.Býblik ekinshi ainalymda álemniń 87-raketkasy, italiialyq Tomas Fabbianomen sheberlik baiqasty.
Buǵan deiin qarsylastar bir ret ózara jolyǵysyp, onda italiialyq sportshy basym túsken edi. Birinshi ainalymda álemniń 4-raketkasy, aýstriialyq Dominik Timdi utyp ketkenT. Fabbiano osal emes-ti.
Úsh saǵat 44 minýtqa sozylǵan match asa tartysty ótip, A.Býblik bastapqy eki sette qarsylasyna 6:7(3:7), 5:7 esebimen ese jibergenimen, qalǵan úsheýinde tarazy basyn aýdara bildi– 6:4, 6:3, 6:3.
A.Býblik úshinshi ainalymda álemniń 70-raketkasy, ispaniialyq Pablo Andýharmen kortqa shyǵady.
Qazaqstannyń birinshi, álemniń 47-raketkasy Mihail Kýkýshkin úshinshi ainalymǵa shyǵa almady. Ol reitingte 105-orynda turǵan aýstraliialyq 20 jasar Aleksei Popyrinnen 6:2, 5:7, 3:6, 2:6 esebimen utylyp qaldy. Birinshi ainalymda álemniń 10-raketkasy, ispaniialyq Roberto Baýtista-Agýtty tize búktirgen M.Kýkýshkin ótken jyly osy jarystyń úshinshi ainalymyna deiin barsa, biyl soǵan jete almai qaldy.
Eske sala keteiik, budan buryn Mihail Kýkýshkin men Aleksandr Býbliktiń jáne Iýliia Pýtintsevanyń US Open týrniriniń ekinshi ainalymyna shyqqanyn jazǵan bolatynbyz.
