Qazaqstannyń birinshi, álemniń 17-raketkasy Elena Rybakina Doha (Katar) premer týrniriniń úshinshi ainalymyna shyqty, dep habarlaidy "Ult aqparat".
E.Rybakina ekinshi ainalymda álemniń 62-raketkasy, belgiialyq Elison Van Eitvankpen sheberlik baiqasty.
Birinshi partiiada belgiialyq sportshy basymdylyq kórsetti – 7:5.
Esesine ekinshi sette Elena breikpen alǵa shyqty – 3:0. Sodan keiin setti jeńispen aiaqtai bildi – 6:2.
Úshinshi, sheshýshi partiiada esep 2:2 bolǵan mezette belgiialyq tennisshi breik jasady. Degenmen Rybakina sol boida qarymta qaiyrdy – 3:3. Esep 4:4 bolǵanda, Elena 0:40-tan óz geimin alyp shyqty – 5:4. Sosyn qarsylasy dop bergende, qos birdei matchbolyn múlt jiberdi – 5:5. Aqyry másele tai-breikte sheshilip, onda qazaqstandyq tennisshi matchboldarynyń birin paidalana aldy – 7:6 (10:8).
Asa tartysty báseke 2 saǵat 21 minýtqa sozyldy.
E.Rybakina shirek finalǵa shyǵý úshin álemniń 1-raketkasy, aýstraliialyq Eshli Bartimen kezdesedi. E.Barti birinshi ainalymda qazaqstandyq Iaroslava Shvedovany joldan taidyrǵan germaniialyq Laýra Zigemýndty 6:3, 6:2 esebimen qinalmai utty.
Elena E.Bartimen biylǵy Aýstraliia ashyq chempionatynyń úshinshi ainalymynda sheberlik baiqasyp, 3:6, 2:6 esebimen ese jibergen bolatyn.
Ótken aptada E.Rybakina Dýbaida álemniń ekinshi jáne úshinshi raketkalary rýmyniialyq Simona Halep, chehiialyq Karolina Plishkovamen kúsh synasqan edi.
Qazaqstandyq tennisshi biylǵy jyldyń eki aiynda tórt birdei WTA jarysynyń finalyna shyǵyp, barlyǵy 21 matchta jeńiske jetti.
Budan buryn 2009 jyldyń alǵashqy eki aiynda reseilik Elena Dementeva 20 kezdesýdi óz paidasyna sheship, rekord jasaǵan edi. E.Rybakina osy kórsetkishten asyp túsip otyr.
E.Rybakina sonymen qatar osylaisha tabysty óner kórsetýiniń nátijesinde tapqan tabysyn 1 mln dollardan asyrdy.
Eske sala keteiik, budan buryn Elena Rybakinanyń Doha týrnirin jeńispen bastaǵanyn, Aleksandr Býbliktiń Dýbai jarysynyń ekinshi ainalymyna, al Iýliia Pýtintsevanyń Dohada úshinshi ainalymǵa shyqqanyn jazǵan bolatynbyz.
