Qazaqstandyq tennisshilerdiń jańartylǵan reitingidegi oryndary belgili boldy, dep habarlaidy "Ult aqparat".
Kásibi tennisshiler qaýymdastyǵy (ATP) málim etkenindei, erler arasynda burynǵysha serbiialyq Novak Djokovich kósh bastasa, ispaniialyq Rafael Nadal ekinshi, aýstriialyq Dominik Tim úshinshi orynda keledi.
Qazaqstannyń birinshi raketkasy Aleksandr Býblik 51-den 54-satyǵa syrǵysa, Mihail Kýkýshkin 90-orynda qaldy.
Ótken aptada Praga 2 týrniriniń jartylai finalyna deiin jetken Dmitrii Popko 178-den 165-orynǵa kóterildi.
Juptyq syn boiynsha M.Kýkýshkin 77-den 80-ge, A.Býblik 100-den 104-ke, Aleksandr Nedovesov 132-den 134-ke tómendese, jýyrda Italiiadaǵy týrnirdiń jeńimpazy atanǵan Andrei Golýbev 111-den 103-ke joǵarylady.
Áielder tennis qaýymdastyǵy (WTA) jariialaǵan reitingide Qazaqstannyń birinshi raketkasy Elena Rybakina 17-ornynda qalsa, Iýliia Pýtintseva 33-ten 35-ke, Zarina Diias 66-dan 69-ǵa syrǵydy.
Aýstraliialyq Eshli Barti, rýmyniialyq Simona Halep jáne chehiialyq Karolina Plishkova burynǵysha úzdik úshtikte.
Juptyq syn boiynsha Galina Voskoboeva 62-inshi, Anna Danilina 126-orynda bolsa, Iu.Pýtintseva 171-den 172-ge tómendedi.
Qazaqstandyq tennisshiler búgin bastalatyn AQSh-tyń ashyq chempionatynda (júlde qory – 53,4 mln dollar) sátti óner kórsetse, reitingilik upaiǵa kóbirek ie bolyp, kórsetkishterin jaqsartady.
Qazaqstandyqtardan alǵashqy bolyp kortqa A.Býblik pen M.Kýkýshkin shyǵady. 1 qyrkúiekke qaraǵan túni A.Býblik ulybritaniialyq Kail Edmýndpen, M.Kýkýshkin majarstandyq Atilla Balashpen kúsh synasady.
