Qazaqstandyq tennisshi Andrei Golýbev álemdik reitingide rekordtyq nátijege qol jetkizdi, dep habarlaidy QazAqparat.
Qazaqstan tennis federatsiiasy málim etkenindei, Rim masters týrniriniń jartylai finalyna deiin jetken A.Golýbev búgin jańartylǵan dúniejúzilik reitingte juptyq synda 21-orynǵa kóterildi. Bul – onyń sporttyq jolyndaǵy eń úzdik kórsetkishi.
Aleksandr Nedovesov 60-satyda qalsa, Grigorii Lomakin 244-orynǵa shyqty.
Qazaqstannyń jekelei syndaǵy birinshi raketkasy Aleksandr Býblik 41-ornynda qalsa, Mihail Kýkýshkin 165-satyda tur. Dmitrii Popko 182-den 180-ge, Timofei Skatov 193-ten 191-ge joǵarylady. Beibit Jýkaev 491-inshi, Dostanbek Tashbolatov 908-orynda keledi.
Qazaqstannyń áielder arasyndaǵy birinshi raketkasy Elena Rybakina 17-den 16-ǵa, Iýliia Pýtintseva 40-tan 37-ge, Zarina Diias 134-ten 131-ge kóterildi.
Juptyq synda Anna Danilina 20-synshy, Jibek Qulambaeva 300-inshi, Gózal Ainitdinova 438-satyǵa jaiǵasty.
Qazaqstandyq tennisshiler Rolan Garros jarysynda sátti óner kórsetse, óz reitingterin jaqsarta alady.
Búgin irikteý saiysynda Zarina Diias reseilik Anastasiia Gasanova, Dmitrii Popko argentinalyq Hýan Ignasio Londero, Timofei Skatov amerikalyq Mitchell Kriýgermen oinaidy.
