Qazaqstannyń birinshi, álemniń 45-raketkasy Aleksandr Býblik Melbýrnda ótip jatqan ATP 250 Great Ocean Road Open týrniriniń úshinshi ainalymyna ótti, dep habarlaidy "Ult aqparat".
Jarystyń 8-raketkasy bolǵandyqtan, birden ekinshi ainalymnan bastaǵan A.Býblik reitingte 121-orynda turǵan aýstraliialyq Kristofer O'Konnellmen kezdesti.
Qazaqstandyq sportshy 23-te bolsa, tájiribelirek qarsylasy odan úsh jasqa úlken edi.
Birinshi partiia tai-breikke deiin jetip, onda qazaqstandyq tennisshi sátti oinai bildi – 7:6 (7:2).
Tartysty órbigen ekinshi set te tai-breikpen bitip, bul joly aýstraliialyq tennisshi jinaqylyq kórsetti – 7:6 (8:6).
Úshinshi, sheshýshi partiiada esep 4:4 bolǵan mezette A.Býblik breik jasady. Sodan keiin matchqa dop bergende, múmkindigin múlt jibergen joq – 6:4.
Tartysty ótken báseke 2 saǵat 7 minýtqa sozyldy.
A.Býblik shirek finalǵa shyǵý úshin álemniń 71-raketkasy, italiialyq Stefano Travaliamen talasady.
Júlde qory 382 575 AQSh dollaryna baǵalanǵan doda 7 aqpanda márege jetedi.
