"KazService" munaiservistik kompaniialar odaǵynyń prezidiým tóraǵasy Rashid Jaqsylyqov Teńiz ken ornyndaǵy tártipsizdikke túrtki bolǵan úsh sebepti atady, dep habarlaidy Sputnik.
Jaqsylyqovtyń aitýynsha, birinshi sebep – bas merdiger kompaniia búkil jumysty ózi atqarǵysy kelgen. Iaǵni, otandyq sýbmerdigerlerdi tartpaǵan.
"Qazaqstandyq kompaniialarmen jumysty bólisken kásiporyndarda mundai jaǵdai joq. Biraq, bul jerde bas merdiger jumysshylardy qaidan aldy degen zańdy suraq týyndaidy. Ol jumyssyz otyrǵan otandyq kompaniialardyń jumysshylaryn ailyǵyn azdap kóterip, ózine shaqyrǵan", - dedi ol mýltimediialyq ortalyqta ótken baspasóz máslihatynda.
Ekinshi sebep, aitýynsha, sheteldik sýpervaizerler, qarapaiym tilmen aitqanda, injenerler.
"Bul qyzmetti atqaratyndardyń bári – sheteldik. Iaǵni, on myńǵa jýyq qazaqstandyq qara jumysty isteidi, al olardy eki júzden astam sheteldik basqarady. Birinshiden, olar til bilmeidi, mádenietten habarsyz, jumysshy men joǵary sapaly maman arasyndaǵy bailanys úziledi, saldarynan túsinispeýshilik paida bolady", - dedi prezidiým tóraǵasy.
Úshinshi sebep, munaiservistik kompaniialar odaǵynyń pikirinshe, sýbmerdiger kompaniialar arasynda demping uiymdastyrý.
"Kim eń tómengi baǵany usynady, jumysty soǵan beremin degen. Osydan keiin otandyq kompaniialar eń tómengi baǵany berýge tyrysady. Bul degenimiz, jalaqy, áleýmettik qamsyzdandyrý nashar degen sóz. Mine, osy sebepten jaǵdai qiyndap, sońy daý-janjalǵa ulasty", - dedi Jaqsylyqov.
Ol qazir atalǵan oqiǵaǵa qatysty quzyrly organdar tergeý jumystaryn júrgizip jatqanyn atap ótti. Arnaiy komissiia qurylǵan, tergeý aiaqtalǵannan keiin, ken ornyndaǵy tártipsizdiktiń naqty sebebi belgili bolmaq.
