Atyraý oblysyndaǵy Teńiz kenishinen shyǵarylǵan jumysshylardyń jalaqysy saqtalady, dep habarlaidy "Ult aqparat".
«Teńizshevroil» JShS úkimetpen jáne jurtshylyqpen bailanys bóliminiń bas menedjeri Rzabek Artyǵalievtyń aitýynsha, Teńiz ken ornynan 18,5 myń jumysshy turǵylyqty mekenjaiyna shyǵarylǵan.
«Vahtalyq tásilmen eńbek etetin qyzmetkerlerdiń koronavirýs infektsiiasyna bailanysty jumysqa shyǵa almaǵanyna qaramastan, olardyń jalaqysy tolyq saqtalady. Al, ken ornyndaǵy vahtalyq merzimi ýaqytynan asqan jumysshylardyń jalaqysyna 1,5 koeffitsient qosylady», - dedi Rzabek Artyǵaliev.
Sondai-aq, Teńiz kenishindegi ahýaldy turaqtandyrý qatań baqylaýǵa alynǵan. Osyǵan orai, qyzmetkerlerdi oqshaýlaý, jeke gigiena erejelerin qamtamasyz etý qatań qadaǵalanady.
«Biz barlyq merdiger mekemeler men jumysshylardan osy sharalardy oryndaýdy talap etemiz. TShO-nyń qaýipsizdik qyzmeti Jylyoi aýdanynyń ákimdigimen, oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti jáne ishki ister departamentimen birlesip, Teńiz ken ornyndaǵy talaptardyń oryndalýyn únemi qadaǵalap otyrady. Talaptar saqtalmaǵan jaǵdaida, TShO kelisimsharttar men eńbek sharttaryn buzyp, qatań sharalar qoldanýǵa quqyly», - dep málimdedi R. Artyǵaliev.
