Qarjy monitoring komiteti «TengriBank» AQ burynǵy basshylaryna qatysty tergeý jumystaryn júrgizip jatyr, dep habarlaidy "Ult aqparat" Komitetke silteme jasap.
«QR Qarjy ministrligi Qarjy monitoring komitetiniń ekonomikalyq tergeý qyzmetiniń basshylyǵymen qurylǵan vedomstvaaralyq jedel-tergeý toby «TengriBank» AQ burynǵy basshylaryna qatysty banktiń 5,4 mlrd teńge qarajatyn jymqyrý deregi boiynsha Qylmystyq kodekstiń 189-baby 4-bóligi 2 tarmaǵy (asa iri kólemde senip tapsyrylǵan bóten múlikti iemdenip alý nemese talan-tarajǵa salý) boiynsha tergeý amaldary júrgizilýde», - delingen habarlamada.
Baspasóz qyzmetiniń aqparatyna sáikes, aǵymdaǵy jyldyń 9 qarashasynda Almaty qalasy tergeý sotynyń sanktsiiasymen 2 aiǵa deiin qamaýǵa alý bultartpa sharasy:
- Banktiń burynǵy Tóraǵasynyń orynbasary Bahtiiar Ábdinuruly Iliasovqa;
- Banktiń Almaty qalalyq filialy basshysynyń orynbasary Áset Órisbaiuly Jadyqovqa;
- Bank qyzmetkerlireniń baqylaýyndaǵy mekeme basshysy Nazgúl Mamanshalqyzy Jylqybaevaǵa (jalǵan qujattar arqyly 3 mln AQSh dollary kóleminde qaitarymsyz nesie alǵan) sanktsiialandy.
Sotqa deiingi tergeý amaldary jalǵasýda.
Eske salsaq, buǵan deiin «TengriBank» AQ basshylarynyń burynǵy orynbasarlary ustalǵany týraly habarlaǵan bolatynbyz.
2020 jyldyń 18 qyrkúieginde QR Qarjy naryǵyn retteý jáne damytý agenttigi «Tengri Bank» AQ-ny barlyq bank operatsiialaryn júrgizý litsenziiasynan aiyrý týraly sheshim qabyldaǵan bolatyn.
