Ulttyq bank Tóraǵasynyń orynbasary Áliia Moldabekova taiaý bolashaqta teńgeniń dinamikasyna áser etetin negizgi faktorlar týraly aitty, dep habarlaidy QazAqparat.
«AQSh kiristiliginiń ósýi jáne dollardyń nyǵaiýy aiasynda damýshy naryqtar boiynsha sentimenttiń nasharlaýy, koronavirýstyń jańa tolqyndarynyń paida bolýy damýshy naryqtar valiýtalarynyń álsireý táýekelin arttyrdy. Bul sheteldik investorlardyń teńgege jáne teńgelik aktivterge degen qyzyǵýshylyǵynyń tómendeýine alyp keldi. Men naýryzda beirezidentterdiń jańa investitsiialarynyń edáýir qysqarǵanyn atap ótken edim. Sáýirdiń basynan bastap jańa investitsiialar bolǵan joq, al 7-8 sáýirde Resei rýbliniń kúrt álsireýinen keiin NDF boiynsha mólsherlemeler 9%-ǵa deiin ósti. Bul sheteldik investorlardyń teńge boiynsha qysqa pozitsiiada ornalasqandyǵynyń ne teńgedegi aǵymdaǵy uzyn pozitsiialardyń qysqarǵanynyń belgisi bolýy múmkin. Hedj-qorlardyń uzyn teńgedegi pozitsiialardan ishinara shyǵýy baiqaldy», - deidi Ulttyq bank Tóraǵasynyń orynbasary Áliia Moldabekova.
Alaida, dollarǵa suranystyń artýy beirezidentterdiń operatsiialarymen ǵana bailanysty emes.
«Biz dividendterdi tóleý jáne olardy ishinara konvertatsiialaý kezeńi esebinen shetel valiýtasyna ishki suranystyń ósýin baiqap otyrmyz. Dividendtik tólemderdiń joǵarǵy shegi 1-30 sáýir aralyǵyndaǵy kezeńge keledi. Sondai-aq, shetel valiýtasyna suranystyń ósýine iskerlik belsendiliktiń qalpyna kelýi yqpal etedi, iskerlik belsendiliktiń ishki indeksi 2020 jyldyń basynan bastap alǵash ret 50 belgisine ótti. Operatsiialyq jáne investitsiialyq qyzmet aiasynda zańdy tulǵalar importty qarjylandyrýǵa valiýta satyp alý kólemin ulǵaitty. Bul birjadaǵy saýda-sattyq kóleminiń ósýinen baiqalady», - deidi ol.
Sondai-aq, naryqtyq sentimenttiń qubylmalylyǵyna qaramastan, teńgeniń budan bylaiǵy serpini, eń aldymen, bizdiń negizgi eksporttyq taýarymyz – munaidyń baǵasymen aiqyndalatyn bolady.
«Munai naryǵyndaǵy teńgerim óte álsiz jáne kóp jaǵdaida energiia tasymaldaýshylarǵa suranystyń ornyqty túrde qalpyna kelýine táýeldi. Óitkeni munai naryǵyndaǵy óndiris kólemine qatysty kelisimdermen rettelýi múmkin usynysqa qaraǵanda suranys koronavirýs jaǵdaiynyń odan ári damýyna jáne vaktsinatsiia qarqynyna tikelei bailanysty bolyp otyr», - deidi Áliia Moldabekova.
